The Definitive Guide to Living in the Capital , Cairo , Egypt

روبن هود، واحد من أكثر الشخصيات المثيرة للجدل في التاريخ. يمكن بسبب إنه بيخلي أي شخص يتابع قصصه يسأل نفسه سؤال أخلاقي: هل من العدل سلب الأغنياء – الفاسدين – أموالهم وإعطائها للفقراء والمحتاجين؟ علشان كده بنعتبر الشخصية دي من أكتر الشخصيات المثيرة للجدل.

شخصية روبن هود ظهرت في العصور الوسطى، ولحد اليوم فيه اختلاف إذا كانت الشخصية دي حقيقية أم وهمية. وفي الفترة دي المجتمع البريطاني كان منقسم لطبقة أغنياء وفقراء وخارجين عن القانون. وروبن كان بينتمي للطبقة الثالثة، لكنه في نفس الوقت كان بيسرق الأغنياء لحساب الفقراء وكان بينتصر للمظلومين والضعفاء.

ومن زمان جدًا بيتم تقديم شخصية روبن هود في مجموعة كبيرة من الأعمال الفنية والسينمائية. لعل أشهرها – وأحدثها – المعالجة اللي تم تقديمها سنة 2010 من بطولة راسل كرو وكيت بلانشيت وإخراج ريدلي سكوت. والحقيقة لو قارننا فيلم النهارده بالنسخة دي مش هيكون في صالحها أبداً لأنها أضعف بكتير من نسخة 2010. علشان كده هنحاول نبعد عن المقارنة خالص.

فيلم اليوم فبيقوم ببطولته تارون أنجرتون في دور روبن هوود، وجيمي فوكس في دور ليتل جون والحقيقة أن الأتنين قدموا أداء تمثيلي جيد. وكان واضح كمان المجهود الجسدي والنفسي اللي قاموا بيه علشان يقدموا لنا في النهاية أدوارهم على الشاشة. لكن مهم نشيد بدور جيمي فوكس اللي على الرغم إنه مش البطل الأساسي للفيلم لكنه قدر يقدم دور قوي ومميز إلى أبعد الحدود.

ولما نتكلم عن توجيه الممثلين لازم نتكلم عن المخرج  أوتو باثيراست والحقيقة أن أوتو مخرج بينتمي أكتر للمسلسلات الدرامية، ويكفي أننا نعرف أنه مخرج مسلسل Peaky Blinders و Black Mirror وهم مسلسلين من أقوى المسلسلات اللي بتعرضها شبكة Netflix مؤخرًا.

والحقيقة أن باثيراست قدر يقدم إخراج معقول للفيلم، مع الأهتمام بجانب المغامرة والحركة أكتر من الدراما وده كان مناسب بشدة لمحبي أفلام الأكشن اللي بيكون نصيب الأسد من أحداثها بيركز على الحركة والمؤثرات البصرية أكتر من الأحداث التراجيدية.

Robin Hood فيلم مغامرات معقول، مع أهتمام بالمؤثرات والتفاصيل المثيرة. وبننصح بمشاهدته في الويك أند.

علشان تبقى عارف: تم تصوير الفيلم ما بين 20 فبراير 2017 وحتى 20 مايو 2017.