The Definitive Guide to Living in the Capital , Cairo , Egypt

لما نتكلم عن Shaun the Sheep يبقى بنتكلم عن واحد من أشهر سلاسل الكارتون –الأنيميشن- حوالين العالم، حتى لما تحول المسلسل لفيلم كان فيلم قوي ومميز ونقصد هنا فيلم Shaun the Sheep Movie (2015)، وكنا متوقعين إن الفيلم الثاني من نفس السلسلة يكون مستواه أعلى في الكوميديا، والحبكة فيه تكون مختلفة والقصة تكون قوية، لكن للأسف ده ماحصلش.

فيلم Shaun the Sheep Movie: Farmageddon بيحكي عن الخروف “شون” اللي بيدخل مغامرة جديدة علشان يرجع كائن فضائي لعالمه الأصلي خوفًا من وصول منظمة شريرة له.

على الرغم من إن القصة ممكن يخرج منها حبكة قوية وكوميديا مميزة، لكن حسينا في النهاية إننا بنتفرج على فيلم ET الشهير لكن في نسخة أنيميشن ضعيفة ومش مترابطة، ويمكن شعورنا أو تقييمنا ده جاي من إننا في مرحلة عمرية كبيرة إلى حد ما، لكن وارد جدًا لو مشاهدين من الأطفال في سن من 3 لـ 9 سنين مثلًا ممكن يعجبهم الفيلم، خاصةً في غياب تام للحوار عن الفيلم، بدرجة تخلي متابعته على الصغار أسهل وفهمهم له أسرع.

من الحاجات الجميلة والإيجابية في الفيلم الرسومات ومدى دقتها، وطريقة تحريك الشخصيات على الشاشة بالطريقة المميزة لسلسلة Shaun the Sheep واللي بيحبها الكبار والصغار.

ونظرًا لصعوبة الأداء الصوتي هنا، فكان ضروري الاعتماد على المؤثرات الصوتية في المقام الأول، مع تقديم الرسومات المميزة جدًا علشان تشرح القصة بدون حوار تقريبًا وهي الحاجة اللي نجح فيها الفيلم بدرجة كبيرة.