The Definitive Guide to Living in the Capital , Cairo , Egypt

على الرغم من السهولة الشديدة اللي ممكن يحقق بيها فيلم رعب موجه للمراهقين في المقام الأول النجاح، خاصة مع تخصص هوليوود لفترة زمنية طويلة في تقديم الأفلام المشابهة، إلا أن النجاح – من وجهة نظرنا – مش هيكون حليف Slender Man لأسباب هنناقشها معاكم في استعراضنا المفصل للفيلم.

فيلم Slender man بيحكي عن قصة مجموعة من البنات بيعيشوا في مدينة أمريكية مملة ولا جديد فيها. لكنهم بينجذبوا لمحاولة كشف الغموض عن اختفاء صديقتهم المقربة. الأختفاء اللي له علاقة بأسطورة شعبية عن مخلوق غريب بيخطف المراهقين إسمه Slender Man.

على الرغم من أن القصة تقليدية وشوفناها في أفلام تانية حققت نجاح كبير، لكن الفيلم كان بيعاني من أكتر من مشكلة. لعل أهمها كانت مشكلة الأداء التمثيلي للأبطال الأساسيين في الفيلم.

الأداء التمثيلي كان ضعيف ومحتاج تحسين كبير. بنشوف جوي كينج في دور (رين) وهي وجه جميل لكن أنفعالاتها التمثيلية كانت ضعيفة وغير متناسبة مع المواقف اللي بتظهر أمامنا على الشاشة.

وجه جميل ثاني هي جوليا جولداني تيليز في دور هالي لكن برضه أدائها التمثيلي كان ضعيف، حتى مع اجتهادها في تقديم دورها بشكل جيد، لكن كان من الواضح أن أهتمام المخرج سيلفاين وايت كان بالمؤثرات الخاصة أكتر من الأداء التمثيلي.

وبما أننا أتكلمنا عن المؤثرات الخاصة، للأسف كان مستواها ضعيف، وتم اللجوء لحيلة تقليل الإضاءة في كتير من المشاهد للمداراة على بعض عيوب المؤثرات الخاصة والنتيجة كانت مشاهد شبه غارقة في الظلام، خاصة في المشاهد في النصف الثاني من الأحداث.

Slender Man فيلم رعب موجه للمراهقين في المقام الأول لكن مستواه الفني جعل شعورنا بالرعب أقل. ننصح بيه لمحبي أفلام الرعب والمهووسين بيها مهما كان مستواها.