The Definitive Guide to Living in the Capital , Cairo , Egypt

شوقة ووحشة.. هو ده الشعور اللي ممكن نوصف بيه استقبالنا لخبر عودة سلسلة Terminator من جديد، سلسلة الأفلام اللي تقريبًا شافها كل شاب مراهق في فترة الثمانينات والتسعينيات. واللي كان الإقبال على تأجيرها في نوادي الفيديو أكثر من خيالي، باختصار ممكن نقول إن سلسلة Terminator كانت التريند السينمائي في الفترة دي.

لكن مع مشاهدتنا لفيلم Terminator: Dark Fate بدأنا نحس إن الماضي أحيانًا بيكون أحسن من الحاضر، وإن بعض سلاسل الأفلام من الأفضل إنها تتوقف واحنا بنكن لها كل حب واحترام بدل ما تكمل و (تهين) نفسها بالشكل ده.

للأسف فيلم Terminator: Dark Fate بيتجاهل أي أحداث بدأت بعد الجزء الثاني من السلسلة، وده مفهوم لإنها الأجزاء اللي ماشاركش فيها منتج Terminator: Dark Fate ومخرج الأجزاء الأولى من السلسلة “جيمس كاميرون” وبنشوف في الجزء الجديد شخصية Terminator جديد بيتم إرساله للقضاء على بنت مراهقة “ناتاليا رييس” في دور “داني راموس” وازاي البشر يقدروا يحموها من القتل؟

في Terminator: Dark Fate حسينا إن المخرج “تيم ميلر” – وهو بالمناسبة مخرج فيلم Deadpool– بيقول لنا “أنتم عارفين القصة فا أنا هقدم لكم شوية مطاردات وأكشن وتبادل إطلاق نار وشكراً على كده” وفعلًا حسينا إن القصة أو التطور الدرامي للشخصيات هي آخر حاجة بيدور عليها أي حد اشتغل على الفيلم ده.

علشان كده كان من أكبر عيوب الفيلم في رأينا هو الأداء التمثيلي، واللي فشل فيه كل الممثلين تقريبًا في القيام بأدوارهم ماعدا “أرنولد شوارزنيجر” نقدر نقول إن السبب هو ظهوره في مشاهد قليلة نجحت إلى حد ما في إثارة مشاعر النوستالجيا عندنا.

بذلنا شوية مجهود علشان ندور على حاجه ممكن تعجبكم في Terminator: Dark Fate لأنه حتى مش كويس على صعيد المشاهدة كفيلم أكشن مستقل بعيدًا عن السلسلة، لأنكم لازم تشوف الأجزاء السابقة علشان تقدروا تفهموا الأحداث اللي بتدور حاليًا.

لكن ممكن نقول إن مشاهد الأكشن والمطاردات وتبادل إطلاق النار تم تنفيذها بميزانية كبيرة، لكن بدون أي تجديد أو اختلاف عن أي فيلم أكشن تاني، ودي حاجة غريبة على إننا نشوفها من مخرج فيلم Deadpool.