The Definitive Guide to Living in the Capital , Cairo , Egypt

لما قرينا اسم الفيلم افتكرنا قصة فيلم تاني كنا اتكلمنا عنه وناقشناه هو Space between us، لكن الحقيقة هي أن قصة الفيلمين مختلفة تمامًا عن بعض، رغم إحساسك ان الفيلمين من نفس العالم، بينما كان Space between us بيحكي عن كوكب المريخ المشهور بحرارته المرتفعة، فيلم The Mountain Between Us أخدنا في جولة وسط الثلوج.. تعالوا نتعرف عليها أكتر.

القصة

الفيلم بيحكي عن شخصين أغراب تمامًا عن بعض، بتجمعهم الصدفة على متن طائرة خاصة في يوم عاصف وفيه اضطرابات جوية كبيرة بتأثر على حركة الملاحة والطيران بشكل كبير، لكن الظروف القهرية بتجمع الأثنين علشان يسافروا مع بعض، ثم بتتطور الأحداث مع سقوط الطيارة وشعور كل واحد فيهم أنه الأمل الوحيد لنجاة الأخر.

فريق العمل

الفيلم من إخراج هاني أبو أسعد ومن تأليف جي ميلز جودلوي عن رواية تشارلز دي مارتن ومن بطولة إدريس إلبا وكيت وينسلت وديرموت مولروني وبيو بردجيس ولوسيا والترز ولي مجدوب، والحقيقة الفيلم يعتبر خطوة مهمة في حياة مخرجه هاني أبو أسعد، وهو مخرج فلسطيني قدم مجموعة من أهم وأشهر الأفلام الفلسطينية زي فيلم الجنة الآن وعمر على سبيل المثال لا الحصر.

الأداء التمثيلي

الأداء التمثيلي كان مقتصر بالمقام الأول على كيت وينسلت وإدريس البا، واللي قدروا يقدموا أداء تمثيلي متميز وقادر على اقناعنا بكل مشهد قاموا به خلال أحداث الفيلم، وده لم يكن ليتم من غير وجود مخرج واعي وقادر على توجيه الفنانين بشكل جيد.

السيناريو والحوار والإخراج

سيناريو الفيلم كان ممل خاصة في الربع الأول من الأحداث، لكن تطور الأحداث بعد كده بيطرد الملل وبيدخلنا في حالة مستمرة من الترقب ومحاولة استنتاج أبطالنا هيعدوا من المأزق اللي هم فيه إزاي، وده شيء يحسب للسيناريو.

أما الإخراج فنجح في إنه يوصل لنا حجم المشكلة اللي وقع فيها الأبطال في كل مشهد من مشاهد الفيلم خصوصًا مع استعمال زوايا تصوير جديدة ومختلفة وقادرة على إنها تعكس لنا شعور الأبطال حتى بدون ما يتكلموا.

الديكورات والموسيقى والأزياء

ديكورات الفيلم كانت متميزة على الرغم من اختيار معظم مشاهد الفيلم للتصوير في أماكن مفتوحة، لكن كمان اختيار الأماكن دي كان رائع ونقلنا شعوريًا لعالم من البرد والشعور بالرغبة في الدفا، الموسيقى التصويرية كمان كانت حماسية وقوية لكنها كانت (رسمية) زيادة عن اللازم في بعض المشاهد، لكن في المجمل الموسيقى والديكورات يعتبروا من الأمور الإيجابية في الفيلم.

الخلاصة

فيلم The Mountain Between Us فيلم متميز لمخرج فلسطيني قوي بيخطو واحدة من خطواته المهمة في عالم الفن. بننصحكم بمشاهدته.

علشان تبقى عارف:

الفيلم مبني على أحداث رواية أصدرت عام 2010 ، تحمل ذات العنوان ومن تأليف الكاتب (تشارلز مارتن).