The Definitive Guide to Living in the Capital , Cairo , Egypt

محبي شخصية لارا كروفت بيبحثوا دايمًا عن أي فيلم بيتناول قصتها علشان يشاهدوه. والحقيقة أن شخصية لارا كروفت مش بس شخصية قوية ومؤثرة في مجال الأفلام، لكن كمان على مستوى ألعاب الفيديو.

القصة

فيلم Tomb Raider بيحكي عن لارا كروفت اللي بتنطلق في رحلة للبحث عن خنجر أثري، بعد اختفاء والدها اثناء البحث عنه، لكن اللي ماحدش يعرفه أن الرحلة هاتتحول من مجرد رحلة للبحث، إلى محاولة يائسة للبقاء على قيد الحياة من خلال مجموعة من المأسي والكوارث اللي بنشوفها على مدار أحداث الفيلم.

فريق العمل

الفيلم من إخراج روار أوتاج وتأليف جينيفا روبرتسون-دويرت، وبطولة أليشيا فيكاندر ودانيال والتون جوجينز ودومينيك ويست وألكساندر ويلوم.

الأداء التمثيلي

إليشيا فيكاندر قدرت تأدي دور لارا كروفت بشكل رائع، ومختلف عن كتير من الفنانات اللي قدموه قبل كده وده يحسب لها، وكان واضح المجهود الكبير اللي قامت بيه علشان تخرج المشاهد الصعبة والخطيرة في الفيلم بالشكل اللي شوفناه به.

السيناريو والحوار والإخراج

سيناريو الفيلم غير ممل على الأطلاق، لكن لو كنت من محبي الأفلام اللي ليها جانب أنساني أو فكري، مش هيعجبك الفيلم لأن كل تركيزه كان على المغامرة والأحداث السريعة والمتعاقبة، أما محبي المغامرات هيشعروا أنهم مش قادرين ياخدوا نفسهم من تعاقب المشاهد والمغامرات في الفيلم.

الديكورات والموسيقى والأزياء

ديكورات الفيلم كانت جيدة، والمؤثرات والخدع السينمائية تم تقديمها بمهارة كبيرة رغم إنها كانت في مشاهد قليلة لكن مؤثرة، وده خلانا نشعر في النهاية أننا أمام مغامرة متكاملة الأركان من خلال أحداث الفيلم.

الخلاصة

فيلم Tomb Raider هيعجب محبي أفلام المغامرات بشكل عام، ومحبي شخصية لارا كروفت بشكل خاص.

علشان تبقى عارف:

تقييم الفيلم على IMDB وصل لـ 6.8 من 10.