نادي الرجال السري
نادي الرجال السري: التريلر ظلم الفيلم
خيانة دكتور سينما غادة عادل غيرة فيلم كريم عبد العزيز كوميديا ماجد الكدواني نادي الرجال السريرغم إن إجازة نص السنة، واحدة من المواسم السينمائية المهمة. اللي بتتنافس فيها الأفلام. إلا إن موسم 2019 أفلامه مش أحسن حاجة. لكن “نادي الرجال السري” قلب الموازين. وقدم توليفة جميلة جدًا، من الكوميديا والرومانسية، في إطار لطيف.
(نادي الرجال السري) بيحكي عن أدهم “كريم عبد العزيز”، الزوج الواقع طوال الوقت تحت سيطرة زوجته الغيورة هاجر “غادة عادل”. واللي بتتحكم في تفاصيل حياته. ورغم استسلامه في الظاهر، إلا إنه في السر بيدير نادي خاص بالرجال، لتسهيل كل المغامرات النسائية. وبتبدأ سلسلة من المواقف الكوميدية تحصل، لما عضو جديد يحاول الاشتراك.
المميز في الفيلم، اعتماده على كوميديا الموقف. وده اللي نجح فيه المؤلف “أيمن وتار”، وقدر يقدمه على الشاشة المخرج “خالد الحلفاوي”.
كالعادة “كريم عبد العزيز” جوكر تمثيل. بيعرف يشتغل أكشن، كوميديا، أو دراما. وشوفناه بألوان مختلفة في أفلام مختلفة زي (الفيل الأزرق) و(ولاد العم). “غاده عادل” لسه محافظة على جمالها وطلتها. بتقدر تأدي مشاهد كاملة بنظرات عنيها بس. أما “ماجد الكدواني” ماكنش في أحسن حالاته. بسبب مساحة الدور نفسها الصغيرة. ومع ذلك المشاهد بتاعته خليتنا نضحك لأقصى حد.
مشاركة ضيوف الشرف زي أحمد أمين، أكرم حسني، وهشام ماجد وغيرهم، كانت مميزة جدًا ومتوظفة صح.
يمكن أسوأ ما في الفيلم هو التريلر. اللي تم فيه اختيار أضعف المشاهد وانتزاعها من سياقها. وبدل ما يشجعنا على المشاهدة، خلى توقعاتنا عن الفيلم أسوأ بكتير من اللي شوفناه.
(نادي الرجال السري) فيلم كوميدي جميل جدًا لازم تشوفوه. بعيدًا عن أي توقعات مسبقة بسبب التريلر.