The Definitive Guide to Living in the Capital , Cairo , Egypt

هرج ومرج

هرج ومرج: فانتازيا الواقع

  • أيتن عامررمزي لينر...
  • درامارومانسي
  • نادين خاننادين خان
  • في1 Cinema
تم التقييم بواسطة
Mohamed Hamdy
قيم
قيم الآن
هرج ومرج: فانتازيا الواقع

بعض الأفلام تشاء الأقدار أنها تولد وفى فمها ملعقة ذهبية! “هرج ومرج” واحد من الأفلام دي، والأسباب قد تتعدد فى سبب ولادة الفيلم بهذا القدر الكبير من الحظ، احتفاء من النقاد الكبار، دعاية نوعية جديدة ومختلفة من خلال ظهور مخرجة الفيلم مع “باسم يوسف” فى برنامج “البرنامج“.

فى رأينا أن السبب الرئيسى فى الحظ الجيد للفيلم والاهتمام به يتمثل فى اسم “نادين” الأخير… “خان”… الرجل اللى قدم لنا مجموعة من أجمل وأحلى الأفلام العربية على مدار تاريخ السينما.. لكن السؤال اللى بـ يطرح نفسه: هل قدرت نادين تخرج من عباءة الأب وتصنع عالمها الشخصى؟

الإجابة مختلطة بين “نعم” خجول و”لأ” أكثر خجلاً، الجو العام للفيلم بـ يحمل بصمة “خانية” بشكل لا يمكن تجاهله، إلا أن النتيجة النهائية كانت مختلفة عن مدرسة “خان” ومنطقته اللى تعود اللعب فيها باقتدار ما حدش يقدر ينافسه فيها.

الفيلم بـ يحكى عن مباراة بين شابين فى حى شعبي فانتازاى، التنافس بين الشابين (رمزى لينر) و(محمد فراج) حول فتاة واحدة (آيتن عامر) بـ يتحول لتنافس شرس بين شخصين مختلفين فى كل شىء، لكن يجمعهم الواقع المر وحب الفتاة اللى بـ تحاول تخلي الباب موارب أمام الاثنين للإحساس بالمجد الشخصى وأنها مرغوبة.

الصراع على الفتاة هو فى واقع الأمر صراع على السطوة والمكانة، كل واحد من الاثنين مش هـ يفرق معاه البنت.. أو العواطف بشكل عام.. لكن هـ يفرق مع كلاهما إحساسه بالعجز وفقدانه القدرة على امتلاك أبسط الأمور فى عالمه الشخصي… عالمه اللى مش بـ يوفر له أى شيء أكثر من امتلاك العلب من القمامة أو بعض اللحوم والعصائر اللى بـ يتم الاحتفال بقدومها من خلال إذاعة داخلية للمنطقة متخصصة فى إهداءات الأغانى وأخبار السرقات.. لمحة فانتازية جديدة من عالم “خان” بـ تطل علينا من خلال ابنته.

الموسيقى التصويرية لحسن خان كانت متميزة جدًا وموظفة بشكل أكثر من رائع فى العمل، وبشكل عام حسينا بجو من الرقي والتميز وسط الواقع العشوائي اللى بـ تصوره الكاميرا.. ناهيك عن الديكورات اللى كانت متناغمة و”مخدمة” بشكل رائع على القصة والمزيكا.

“هرج ومرج” فيلم مصرى فانتازى واقعى، على الرغم من بعض الأمور اللى ما نالتش إعجابنا، ما نقدرش نقارنه بموجة أفلام المقاولات اللى أغرقت السينما العربية الأيام دي. ننصحكم تشوفوه وتقولوا لنا رأيكم.

عجبك ؟ جرب

بالألوان الطبيعية.

نصيحة 360

الفيلم يعتبر محل اهتمام عشاق السينما نتيجة اسم مخرجته نادين خان ابنة المخرج الشهير محمد خان، كمان استضاف الاعلامى الشهير باسم يوسف نادين فى الفقرة الفنية من أحد حلقات برنامجه "البرنامج".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح