The Definitive Guide to Living in the Capital , Cairo , Egypt

طوال الوقت، بـ تثبت لنا هوليوود قدرتها على صنع مزيج مختلف من التيمات للخروج بأفلام مجنونة، زى مثلاً مزج الرومانسية بالكوميديا، أو الكوميديا بالرعب، وفى حالة 22 Jump Street بـ يتم مزج الكوميديا بالأكشن بالمغامرات فى مزيج أخرج لنا فيلم نقدر نقول أنه قدر يحقق نجاح كويس، خصوصًا اعتماده على الجزء الأول من نفس السلسلة اللى بـ تحمل نفس الاسم مع بعض التصرف.

من إخراج فيل لورد وكريس ميلر بـ نشوف جونا هيل، تشانينج تاتوم، فى فيلم بـ يجمع بين الأكشن والكوميديا، عن اثنين من ضباط الشرطة الظرفاء اللى بـ يدخلوا أحد الجامعات فى مهمة القبض على أحد العصابات، الأحداث بـ تتزايد بعد كده وتتطور بشكل كوميدي صارخ.

نقدر نقول أنه على صعيد الفكرة، موضوع دخول ضباط الشرطة المتخفين للحرم الجامعى، فكرة “اتهرست” فى ألف فيلم قبل كده، ويمكن من المحاولات العربية لتقديم نفس الفكرة شوفنا فيلم “الباشا تلميذ” بطولة كريم عبد العزيز وغادة عادل واللى كان بـ يناقش فى إطار كوميدي، المفارقات اللى بـ تحصل نتيجة محاولة أحد الضباط كشف عصابة فى الجامعة لتجارة المخدرات.

رجوعًا لفيلمنا.. على الرغم من تكرار الفكرة، إلا أن معالجتها -وخصوصًا الخيط الكوميدي للأحداث- قدروا أنهم ينسونا الموضوع ده، لكن على صعيد الأكشن، نقدر نقول أن جرعتها فى الفيلم ما كانتش بالقوة اللى متصورينها، ونقدر نصنف الفيلم فى النهاية كفيلم كوميدي يتخلله بعض مشاهد الأكشن على سبيل إرضاء المشاهدين والسلام.

الموسيقي التصويرية والديكورات لعبت دور مهم فى اندماجنا فى الأحداث، ونقدر نقول أن الديكورات كان لها النصيب الأكبر من الاهتمام من صناع الفيلم، كمان اختيار أماكن مفتوحة وشواطئ فى بعض المشاهد يحسب للمخرج لا عليه، لكن بشكل عام، منطقة الديكورات والموسيقى مش بـ تكون مهمة أوى فى النوعية دى من الأفلام، وبـ يتم الاهتمام بأمور زى الحوار أو الصورة أو حتى الحبكة الأساسية للفيلم.

باختصار Jump Street 22 فيلم أكشن كوميدي يستحق المشاهدة فى أجازة نهاية الأسبوع بدون توقعات بأكثر من كونه فيلم خفيف يصلح للمشاهدة مع الفيشار!