The Definitive Guide to Living in the Capital , Cairo , Egypt

السينما المصرية لسه قادرة على إبهارنا، كل ما نشوف فيلم ونقول هو ده قمة الهبوط والإنحدار والسقوط السينمائي نشوف فيلم تاني يحسسنا أن الفيلم اللي قولنا عليه كده كان يستحق الأوسكار مقارنة بالإبداع الجديد.. في الهبوط.. وده اللي ينطبق تحديدًا على فيلم 30 يوم في العز.

من تأليف سيد سبكي وإخراج هاني حمدي بنشوف قصة هروب مجموعة من المساجين من السجن لتنفيذ مهمة معينة لمدة 30 يوم كاملين، عملية الهروب واللي بيحصل قبلها وبعدها المفروض بيفجروا مجموعة من المواقف الكوميدية اللي تخلينا نقع على الأرض من كثرة الضحك.. الحقيقة أننا كنا هنقع على الأرض من فرط الملل والزهق والشعور بالسقوط الفني.

سعد الصغير، وصوفينار، ومحمود الليثي أصبحوا ثلاثي سينمائي في أفلام المقاولات، سعد الصغير بتلميحاته الجنسية وصوفينار بجسمها ورقصاتها، ومحمود الليثي بقدرته غير النهائية على تلقي الصفعات والتعرض للإهانات، والحقيقة أن دي واحدة من أغرب المؤهلات اللي ممكن نشوفها علشان مطرب يشارك في الأفلام هى أنه يكون مؤهل أن أبطال الفيلم يضربوه بالأقلام ويتباهى في أحد المشاهد بالموضوع ده!

طبعًا من المهين أننا نتكلم عن الديكورات والموسيقي التصويرية في عمل كل همه أنه يجمع أكبر قدر من فلوس الشباب والمراهقين في السينمات في فترة العيد قبل ما يتباع -الفيلم- للفضائيات علشان يجيب باقي أرباحه.. النوعية دي من الأفلام بتقتل صناعة السينما المحترمة وبترجعنا سنوات للخلف.