The Definitive Guide to Living in the Capital , Cairo , Egypt

من القصص المشهورة عن ولاء الكلاب، قصة الرجل اللي أفنى عمره في خدمة أحد الملوك، لكن حصلت وقيعة بينهم فأمر الملك بقتله بتقديمه للكلاب المسعورة، وبعد فترة قضاها الرجل مع الكلاب اللي هتقتله، أصبحوا أصدقاؤه ورفضوا أذيته.. الكلاب طوال الوقت بتثبت أنها أفضل من كتير من البشر، وأن الحيوان أحيانًا يكون أفضل من الإنسان بإخلاصه وأمانته.

فيلم A Dog’s Purpose من تأليف كاثرين ميشون ومقتبس عن رواية وبروس كاميرون اللي بتحمل نفس الاسم، والأداء الصوتي لجوش جاد وبريت روبرتسون مع دينيس كويد وجوليت ريلانس.

الفيلم بيحكي عن قصة كلب بيسعى لاكتشاف سبب وجوده في الحياة من خلال عدة خبرات بيعيشها مع مُلاك مختلفين، وإزاي الكلب بشكل عام بيؤدي أدوار مهمة جدًا للمجتمع، أو حتى مؤثرة في الحياة الشخصية لأصحابه.

من أكتر الأمور المميزة اللي لفتت انتباهنا في الفيلم الأداء الصوتي المتميز لجوش جاد، وقدرته على أداء شخصية صعبة ومعقدة زي شخصية الكلب، لكنه قدر يأديها علي الرغم من أن كل وسائل تواصله مع الجمهور كانت فقط من خلال صوته!

الأمر الثاني المميز في الفيلم كان الموسيقى التصويرية المتميزة واللي حسينا أنها بتعبر عن كل لحظة من لحظات الفيلم كما ينبغي، سواء كانت لحظات كوميديا أو رومانسية أو حتى أكشن.

من المميز كمان في الفيلم السيناريو الشيق اللي بيبعدنا عن الملل، وقدرته على التنوع بين الكوميديا والحركة والرومانسية بدون ما يفقد الخيط الأساسي له، أما الديكورات في رأينا فكانت محتاجة تكون أفضل من كده، لكن بشكل عام مانقدرش نقول أن كان لها تأثير سلبي علي الأحداث.

الفيلم أعاد لذاكرتنا أفلام كتيرة تناولت الكلاب كشخصيات رئيسية في أحداثها أو حتى موضوعات أساسية بتتكلم عنها، زي فيلم بيتهوفن من إنتاج التسعينات أو Eight Below من إنتاج 2006 أو حتي فيلم Turner & Hooch من بطولة العظيم توم هانكس.

لو كنت من محبي الحيوانات بشكل عام والكلاب بشكل خاص A Dog’s Purpose هيكون الفيلم المثالي بالنسبة لك، أما لو ماكانش عندك حيوان أليف، الفيلم هيخليك عاوز تقتني واحد بأسرع وقت ممكن!

علشان تبقي عارف: الفيلم مقتبس عن رواية بتحمل نفس الاسم.