The Definitive Guide to Living in the Capital , Cairo , Egypt

عنوان الفيلم عبارة عن مثل قديم مشهور، اختلف الناس اللي بتفهم في أصول الأمثال لقسمين بخصوص أصل المثل ده.. القسم الأول بيقول أن الإمبراطورية الرومانية كانت مهتمة بعمل طرق مرصوفة وممهدة بين كل مدينة تفتحها وبين روما، لسهولة الوصول لها وقمع أي تمرد يحصل فيها بسرعة، والقسم التاني بيقول أن المثل أصله فرنسي، وبيرمز للكنيسة الرومانية القديمة والمقصود به إن مهما الإنسان ضل في تصرفاته، لازم هيرجع للكنيسة الأم في النهاية.. لكن فيلمنا بيتبنى وجهة نظر مختلفة تمامًا.

فيلم All Roads Lead to Rome بيقدم حدوتة كوميدية خفيفة، ورومانسية بحتة، من خلال التأكيد على فكرة الحب الحقيقي، وأن الإنسان لو حب إنسان بجد ممكن يعمل علشانه أي حاجة، وأن العالم كله لو تآمر ضده، ده مش هيمنعه من تنفيذ مخططه بالفوز بقلب حبيبه أو حبيبته.

الفيلم من إخراج  إيلا لمهاجن وبطولة كلوديا كاردينالي وسارة جيسكا باركر وراؤول بوفا، بيحكي قصة امرأة بتقرر مقابلة حبيبها في روما والزواج منه، رغم تقدمهم فى السن ورغم رفض ابنها، وبتنطلق فى رحلة بتاخد وقت الفيلم كله، بمشاركة بنت مراهقة عندها مشاكل كتير فى التواصل مع والدتها.

المطاردة اللي ابتلعت زمن الفيلم كله تقريبًا فكرتنا بمطاردات الأفلام العربية زمان زي المطاردة اللي بتستمر على مدار الفيلم كله في فيلم (حماتي ملاك) مثلًا، وغيرها من الأفلام اللي بتاخد من المطاردة وسيلة لحكي الفيلم وإدخال المشاهدين في تفاصيل الأحداث.

الممثلة العالمية كلوديا كاردينالي لسه قادرة تثبت نفسها كممثلة قوية، متقبلة فكرة تقدمها فى العمر، وقدرتها على تقديم أفلام متناسبة مع الفترة العمرية اللي هي فيها، وفى نفس الوقت بيتم الإحتفاء بها خلال تترات الفيلم من خلال عرض أغنية قديمة لها بتفكر كل محبيها بأعمالها وفنها.

لو سألتنا عن أفضل شيء عجبنا فى الفيلم على الإطلاق هنجاوب بدون تفكير: الموسيقى التصويرية.. سواء التيمة الأساسية للموسيقى واللي كانت بتنطلق مع كل مشهد مطاردة أو مغامرة، أو الأغاني الموجودة في الفيلم، كلها أمور كانت جميلة جدًا ومتميزة ومتماشية مع الجو الإيطالي العام للأحداث، لكن لو سألتنا عن الأسوأ؟ هنقول أنه كان سيناريو الفيلم اللي حاول يخلط الكوميديا بالرومانسية فكانت النتيجة النهائية مش رومانسية قوي ومش كوميديه قوي.

All Roads Lead to Rome  فيلم متوسط الجودة بنرشحه لمحبي الأفلام الهادية المعتمدة على المفارقات الكوميدية والرومانسية بشكل كبير.