The Definitive Guide to Living in the Capital , Cairo , Egypt

أفلام
American Pastoral

American Pastoral: هل كانت أمريكا جنة في الستينيات؟

  • أيوان مكجريجورجينيفر كونيلي...
  • دراماغموض وتشويق
  • أيوان مكجريجور
  • في1 Cinema
تم التقييم بواسطة
Mohamed Hamdy
قيم
قيم الآن
American Pastoral: هل كانت أمريكا جنة في الستينيات؟

لو سألتونا عن أهم عامل من عوامل نجاح أي فيلم، هتكون إجابتنا بدون تردد أن العنصر الأساسي لنجاح الفيلم هو قوة (الورق)… قوة القصة والسيناريو والحوار اللي بيشكلوا الركيزة الأولى في أي عمل سينمائي قوي ومتميز وقادر على المنافسة.

وبالنسبة لفيلم American Pastoral المقتبس عن رواية من أشهر الروايات الصادرة في الولايات المتحدة للكاتب فيليب روث، هنلاقي أن المخرج إيوان ماكجريجور قدر يحولها لفيلم قوي ومتميز بمساعدة جون رومانو فيما يتعلق بالسيناريو والحوار.

الفيلم من بطولة إيوان ماكجريجور وهنا بيتضح لنا أهمية كون المخرج هو نفسه البطل، الأمر اللي بيعطيه القدرة على التكامل بين قدراته الإخراجية والتمثيلية، لكنه في المقابل بيضع عليه عبء إدارة الممثلين وإدارة نفسه هو الأخر ودي حاجة مش سهلة  إطلاقًا، ويمكن أشهر مثال في المنطقة العربية على المخرج الممثل كانت مع العبقري يوسف شاهين.

بيشارك ماكجريجور البطولة جينيفر كونيلي وداكوتا فانينج وبيتر ريجرت ومولي باركر، وجدير بالذكر أن الفيلم كان له فريق أبطال مختلف تمامًا مكون من بول بيتاني وإيفان ريتشل وود، لكن تأخير تنفيذ الفيلم وارتباط الأبطال بأعمال تانية خلانا في النهاية نشوف الأبطال الحاليين.

الفيلم بيحكي عن قصة أسرة أمريكية مثالية بتعيش في فترة الستينيات.. الحياة المثالية للأب والأم والإبنة مش بتستمر كتير مع تغير السياسة الأمريكية ورغبة الإبنة في تغيير معتقداتها السياسية، الأمر اللي بيجر الأسرة لسلسلة من المشاكل بنشوفها على الشاشة بالتزامن مع العديد من التغيرات في المجتمع الأمريكي في الستينيات على كل الأصعدة السياسية والاجتماعية والاقتصادية، بيرصدها الفيلم بتدقيق يصل لدرجة التوثيق أحيانًا.

الأداء التمثيلي لكل الأبطال كان واحد من أهم عوامل نجاح الفيلم من وجهة نظرنا، لكن عوامل تانية كان لها جانب لا يستهان به من أسباب نجاح  الفيلم، زي الديكورات المتميزة، وأماكن التصوير اللي كان فيها جزء كبير معتمد على المناظر الطبيعية، كمان حركة الكاميرا الهادئة الواثقة وقدرتها على نقل الأحداث بهدوء من خلال كادرات متوسطة بتركز على تفاصيل الأحداث بدون ما تجعلنا نفقد تركيزنا مع السيناريو، كل العوامل دي كان لها دور كبير في نجاح الفيلم من وجهه نظرنا.

الموسيقى التصويرية كمان لعبت دور بارز مع الأحداث علشان نشعر بتفاصيل القصة على الشاشة، ونقدر نعتبر الفيلم واحد من الأفلام اللي هتنافس على جوائز الأوسكار اللي بيتم الإعلان عنها في فبراير 2017 لكن في رأينا إن أفلام كتير هيتم طرحها في الفترة القادمة هتجعل التنافس على الأوسكار أكتر حدة.

فيلم American Pastoral إمتداد لمبدأ بدأ يتكون عندنا، بأن الروايات القوية ممكن تتحول لأفلام قوية، فقط لو وقعت في أيدي المخرجين وكتاب السيناريو المناسبين… إنتوا إيه رأيكم؟

عجبك ؟ جرب

American Gangster

نصيحة 360

الفيلم يعتبر أول تجربة إخراجية للنجم (إيوان ماكجريجور).

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح