The Definitive Guide to Living in the Capital , Cairo , Egypt

البحر الأسود هو بحر داخلي يقع بين الجزء الجنوبي الشرقي لأوربا وآسيا الصغرى يتصل بالبحر المتوسط عن طريق مضيق البوسفور وبحر مرمرة ويتصل ببحر آزوف عن طريق مضيق كيرتش.

على الأقل هي دي المعلومات اللى بـ يقولها موقع ويكيبيديا عن البحر الأسود، لكننا نعتقد أن رحلة الفيلم ما كانتش مجرد رحلة في الجغرافيا، لكن كمان رحلة فى النفس البشرية، اللى ممكن يكون سوادها واهتمامها بالمال يجعلها أسود من… البحر الأسود!

من تأليف دينيس كيلي وإخراج كيفين ماكدونالد وبطولة جود لو وجودي ويتيكر وبين ميندلسون بـ نشوف سيناريو بـ يتأرجح بين التشويق والإثارة مع لمسة بسيطة من الرعب النفسى القائم على مشاهد الصراع تحت الماء عن كابتن بحار بـ يسعى للبحث عن غواصة ألمانية غارقة مليئة بالذهب، مع وعد بحصة متساوية من الذهب لكل الأعضاء المشاركين فى العملية.

الفيلم بـ يشبه فى قصته وأسلوبه عدد كبير من الأفلام اللى بـ تتكلم عن اقتسام حصة من الذهب أو السعي وراء كنز مختفى، زي سلسلة The Italian Job أو The Good, The Bad and The Ugly وغيرها من الأفلام، لكن المختلف فى الفيلم المرة دي أن الحبكة الأساسية بـ تدور تحت الماء.

الجزء المتميز من الحكاية بـ يتمثل فى طبيعة النفس البشرية ورغبتها فى تحقيق الثراء حتى لو كان على حساب المبادئ أو الأخلاقيات أو حتى على حساب الأمن الشخصى أو احتمالية التعرض للموت.. تحت سطح البحر.

الأداء التمثيلي للأبطال كان متميز، مع تركيز إخراجي على اللقطات القريبة والتركيز على ملامح الوجه فى حالات مختلفة من الإرهاق والخوف أو حتى الغضب، ومن هنا لازم نتكلم عن النقطة الثانية: التصوير المتميز تحت الماء واللى عرفنا أنه تم فى غواصة حقيقية قديمه تابعة لروسيا، الأمر اللى ساعد على إكساب الأحداث واقعية وقوة.

الموسيقى التصويرية على الرغم من قوتها إلا أنها ما كانتش متناسبة مع نوعية الأحداث، وحسينا أنها كانت مكررة ومستهلكة ومش على نفس مستوى الفيلم، لكن الفيلم بشكل عام مستواه قوي وننصح بمشاهدته لمحبى أفلام الأكشن المعتمدة على فكرة مختلفة وأسلوب راقى من الأداء التمثيلى.