The Definitive Guide to Living in the Capital , Cairo , Egypt

بقى لنا فترة طويلة ما شوفناش كوميديا جميلة ومعتمدة بالمقام الأول على المواقف الكوميدية بأكثر من اعتمادها على النكات أو القفشات الكوميدية.. الحقيقة أن فيلمنا اليوم بيقدم جرعة كبيرة من الكوميديا مع شوية أكشن بحكم مشاركة الفنان دواين جونسون المشهور عنه أداؤه لأدوار الأكشن.

فيلم Central Intelligence من إخراج روسون مارشال وبطولة أرون بول، دواين جونسون، وكيفن هارت، بيحكي قصة حياة رجل هو كيفن هارت، واللي كان نجم المدرسة الثانوية في الماضي، وكان زميله (دواين جونسون) مراهق غبي بيسخر الجميع منه.

الفيلم بيقفز بينا بالسنوات لوقتنا الحالي علشان نشوف إيه حصل مع أبطالنا، اللي حصل هو العكس تمامًا.. كيفن هارت تحول لمحاسب بيعيش حياة تقليدية ومملة، وبيتذكر كل شوية نواياه ورغباته العظيمة أيام الثانوية، ثم بيقابل صديقه القديم (دواين جونسون) اللي كان مثار سخرية من الجميع، فقط علشان يكتشف أنه تحول لرجل مفتول العضلات مهتم بصحته، والأغرب: أنه أصبح يعمل في المخابرات، وبيحاول يوصل لإرهابي قبل ما يبيع سلاح سري، كل ده باستخدام (كيفن هارت) اللي بيلاقي حياته كلها بتتشقلب أمام عينه مفجرة مجموعة لا تتوقف من السخرية والمواقف الكوميدية.

لأول مرة بنشوف المهارات الكوميدية لممثل أكشن كبير بحجم دواين جونسون (الجسدي والفني)، أما كيفن هارت فقدر يستمد دوره الكوميدي من دور صديقه اللي بيشاركه البطولة، وقدر يخلينا نضحك بلا توقف طوال زمن عرض الفيلم، لكن الكوميديا بتتراجع في الربع الأخير من الفيلم على حساب الأكشن اللي ماكانش بنفس القوة اللي كانت عليها الكوميديا.

سيناريو الفيلم متجدد ومتفجر طوال الوقت، وما حسيناش بالملل أبدًا بل على العكس كنا في أنتظار كل حدث جديد علشان نشوف رد فعل كيفن هارت عليه هيكون إزاي، أما الموسيقى التصويرية فكانت رائعة ومتوظفة بشكل مثالي علشان تحسسنا بالإثارة طوال الوقت، وبعض أغاني الفيلم حسينا أننا عاوزين نعرف اسمها علشان نرجع لها تاني ونسمعها على رواقة، وده من وجهة نظرنا من عوامل نجاح الموسيقى التصويرية لأي فيلم.

Central Intelligence فيلم كوميدي جميل وخفيف، ننصح بمشاهدته في الويك إند لنهاية أسبوع كلها حيوية وضحك.