The Definitive Guide to Living in the Capital , Cairo , Egypt

إيه اللى ضايقنا من الفيلم أكثر من الرعب اللى كان شبه منعدم؟ الكآبة اللى كانت بـ تطل من كل مشهد.. من البداية للنهاية، والإحساس العام اللى تسرب لنا أن الفيلم مافيهوش أي شىء يدعو لأي مشاعر غير الكآبة.. اللهم إلا مشاهد الأشباح اللى تم صنعها بجرافيك ضعيف متهالك.. وخيط رومانسي ضعيف جدًا تسرب لنا خلال الأحداث.

الفيلم بـ يتبع مدرسة في الرعب قائمة على الرعب من الأماكن الحية أو القائمة بذاتها.. المنازل اللى بـ يلفها الغموض وبـ تسكنها أشباح وقدرات خارقة وغير عادية، مع استعمال أساليب تصوير وإضاءة خافتة وتسرب لنفسنا حالة من الكآبة المختلطة بالغموض.. لكن الرعب كان غائب عن الخلطة السينمائية، ولو كان موجود بنسبة أكبر كان هـ يكون لنا تقييم مختلف للفيلم.

من إخراج جيليرمو ديل تورو وبطولة توم هيدليستون وجيسيكا تشاستين وميا واسيكوسكا وبيرن جورمان بـ نشوف أحداث قائمة على مؤلفة بـ تحاول تبدأ حياة عملية جديدة بـ تضطرها لمقابلة رجل نبيل أرستقراطي هو توم هيدليستون وأخته اللى بـ تعيش معاه في منزل غريب وملفت للنظر وشبه "حي" وقائم بذاته تمامًا، ومن هنا المفروض بـ يتولد الرعب.

لا نخفى عليكم شعورنا بالملل خصوصًا في الجزء الأول من الفيلم، وحسينا أن الأحداث بـ يتم مطها بصعوبة لمحاولة زيادة زمن عرض الفيلم، الأمر اللى ضايقنا وحسسنا بالاستغلال خصوصًا مع إحساسنا أن الفيلم بالكامل كان يستحق مشاهدة منزلية في أجازة نهاية الأسبوع بأكثر من التوجه للسينما لمشاهدته.

الرعب كان هـ يكون أكثر لو ما كانش معتمد على المؤثرات الغريبة والأقرب للكرتونية، ولو تم الاعتماد على الرعب المنسجم مع المكان وزوايا الإضاءة والتصوير كانت النتيجة هـ تكون أفضل من كده بكثير.

على الرغم من تميز الصورة بشكل عام في الفيلم، واحتواءه على مشاهد متميزة وغنية بالتفاصيل، إلا أن للأسف ضعف القصة واعتمادها على الكآبة في جزء كبير منها أدى إلى فشل الخلطة النهائية للفيلم وجعل تميز الملابس والديكورات والموسيقى وباقي عناصر الفيلم يقفوا عاجزين عن إنهاء المعادلة بشكل جيد بالنسبة للمشاهد النهائي البسيط واللى دخل الفيلم وكان متوقع أنه هـ يتفرج على فيلم رعب.. لكن الحقيقة أن الفيلم في النهاية طلع فيلم كئيب.. والفرق بين الفيلم المخيف والفيلم الكئيب زي الفرق بين السماء والأرض! وإن كانت الحسنة الوحيدة للفيلم هي قدرته على نقلنا لأجواء القرن الـ 19 بنجاح.. لكن هل دي الحسنة الوحيدة اللى ممكن بسببها نحترم فيلم؟.. والمفروض أنه فيلم رعب!