-
إد سكيرينرايان رينولدز...
-
إثارةحركة ومغامرات...
-
تيم ميللرتيم ميللر
-
في1 Cinema
Mohamed Hamdy
نعتقد أن حتى صناع فيلم Deadpool ما كانش عندهم القدر ده من التفاؤل ناحية الفيلم وهم بصدد إنتاجه، على الرغم من أن شركة Marvel بجلالة قدرها عارفة كويس هى بـ تعمل إيه وبـ تقدم إيه وإمتى ولمين بالضبط، لكن يفضل النجاح الكبير اللى حققه ومازال بـ يحققه فيلم Deadpool خارج كل التوقعات وفوق كل الاحتمالات.. لكن إحنا عارفين أسباب النجاح ده.. وهـ نشرحه هنا!
أولًا الفيلم بـ يسخر من Marvel نفسها ومن نوعية الأفلام اللى بـ تقدمها، بداية من التترات اللى بـ توجه رسائل شديدة اللهجة وساخرة جدًا زي مثلًا أنهم يكتبوا عن المخرج أنه "وغد" بـ يتقاضى أجر كبير، وعن شرير الفيلم أنه "شرير بلهجة بريطانية"… إلخ ونهاية بالسخرية من هوليوود نفسها ومن سلاسل الأفلام المختلفة زي “Taken” على سبيل المثال، وكل ده من خلال سخرية لاذعة وألفاظ خارجة وتشبيهات جنسية دفعت بالسينمات المصرية لعرض الفيلم "للكبار فقط".
الفيلم من إخراج تيم ميلر وبطولة رايان رينولدز ومورينا باكرين وجينا كارانوا وآخرين، وبـ يتبع النهج التقليدي لأفلام Marvel فى استعراض حياة شاب بـ يكتشف إصابته بالمراحل الأخيرة لمرض السرطان، لكنه بـ يتلقى عرض لشفاؤه وتحويله لبطل خارق، ومن هنا بـ يقبل العرض لكن بـ تحصل بعض التعقيدات فى الأحداث اللى بـ تمنع تحوله لبطل خارق، وبـ يبدأ يسعى للانتقام، وده ثاني شىء جديد نشوفه فى الفيلم أنه مش عن بطل خارق، هو عن شخص خارق بـ يسعى للانتقام… والفرق كبير.
الاختلاف الثالث والأهم فى الفيلم ده بـ يتمثل فى السيناريو المختلف للأحداث، والمونتاج المتميز اللى قدر يمنع تسرب الملل لنفوسنا على العكس من باقى أفلام Marvel اللى أصبحنا حافظين التيمة الأساسية بتاعتها، المرة دي بـ نشوف الأحداث من المنتصف تمامًا، ثم بـ يبدأ السيناريو ياخدنا فى جولة للأحداث اللى تمت قبل المشهد الافتتاحي، والأحداث اللى تمت بعده.. وده كان ممتع وشيق إلى أبعد حد.
طبعًا الموسيقى التصويرية كان لها دور كبير فى الأحداث، بداية من الموسيقى الحماسية والأغاني القوية اللى شوفناها خلال الأحداث، أما عن التقنية والخدع السينمائية فـ كانت فى مستوى جودة متوسطة، على الرغم من مشاهدتنا الفيلم عبر شاشاتالعملاقة IMAX ، إلا أننا حسينا أن مستوى الفيلم لا يقل عن باقى أفلام Marvel اللى عودتنا على جودة متميزة للخدع السينمائية فى أفلامها.
الفيلم هـ يكون مثالى للمشاهدة لمحبى أفلام الـSuper Heroes بشكل عام، ولعشاق سلاسل أفلام Marvel بشكل خاص، ونعتقد أن الأيام الجاية هـ تحمل المزيد والمزيد من المفاجآت عن الفيلم فيما يتعلق بالإيرادات وخلافه.