The Definitive Guide to Living in the Capital , Cairo , Egypt

Demolition

Demolition : انسف حياتك القديمة!

  • جودا لويسجيك جيلينجهايل...
  • دراماكوميدي
  • جون-مارك فاليهجون-مارك فاليه
  • في1 Cinema
تم التقييم بواسطة
Mohamed Hamdy
قيم
قيم الآن
Demolition : انسف حياتك القديمة!

طريقة تعامل أي إنسان مع أي أزمة بيمر بيها، بتختلف من شخص لآخر، ولما يكون الحادث قوي وفيه خسارة ناس بنحبهم، بتكون الإختلافات في طريقة تقبل الأمر فيها فروقات كبيرة، لكن طريقة دافيس ميتشل أو جيك جلينهال.. بالتأكيد كانت الأغرب والأكثر إثارة!

فيلم Demolition من إخراج جان مارك فاليه بيبدأ بمشاهد إفتتاحية لاستعراض حياة دافيس ميتشل اللي بيشتغل في مجال الاستثمار والبنوك، وزواجه الناجح من بنت مديره فى الشغل، والحياة الرائعة اللي بيعيشها، واللي بتنتهي بعد دقايق من بداية أحداث الفيلم بحادثة مروعة بتموت فيها زوجته وبيظل هو على قيد الحياة، وبدون إصابات تذكر!

بعد تلقيه خبر وفاة زوجته، بيحاول ياكل (بار) شيكولاته من ماكينة المستشفى، لكنها كانت مش شغاله، ومن هنا بيبدأ (دافيس) فى إرسال بعض الخطابات لقسم خدمة العملاء في شركة تصنيع الماكينات، لكن الرسائل مش بتحتوي على الشكوى فقط، بل بيبدأ دافيس في الحكي عن تفاصيل حياته وشعوره بالحادث وظروفه قبل وبعد الحادث، كل ده بإسلوب أدبي كأنه بيطلع طاقه غضب وحزن وألم من جواه على الورق.

مع الوقت بيتعرف دافيس على كارين مورينو رئيسة خدمة العملاء في الشركة، واللي بتقرأ جواباته وبتبدأ تتابع حياته تمهيدًا لقصة حب غريبة.. وأحداث أغرب مش عاوزين نحرقها عليكم.

الفيلم بيتبع أسلوب فلسفي نفسي معقد شوية، علشان كده مش هيعجب الغالبية العظمي من المشاهدين، والجمهور القليل اللي حضر معانا الفيلم غادر القاعة في الإستراحة ومارجعش تاني، والحقيقة أن سيناريو الفيلم يتحمل جزء من اللوم لأنه ما قدمش أحداث كتير، والأحداث القليلة اللي قدمها كانت غير جاذبة للجمهور المصري، كمان أسلوب المونتاج الخاص بالفيلم كان ممكن يسبب بعض الاضطراب للمشاهدين اللي بيتوقعوا خط سير نمطي للأحداث.

مشاهد الرقص في الشارع والاستماع للموسيقى كانت من أحلى وأمتع مشاهد الفيلم، وأعطتنا طاقة إيجابية متميزة وعرفتنا قد إيه جيك جيلنهال ممثل عبقري وقادر على أداء الأدوار المطلوبة منه بعفوية عبقرية.

رسالة فيلم Demolition هي أن لما تتعرض لمواقف صعبة في حياتك.. وتحس أن الدنيا مش ماشية معاك صح، فكك حياتك حتة حتة، وجرب حاجات جديدة وحاول تبدأ من أول وجديد وشوف الأمور هتوصل بيك لحد فين.. ونصيحتنا ليكم : ادخلوا الفيلم لو بتحبوا السينما غير التقليدية، علشان هو مش شبه الأفلام الاعتيادية الموجودة في دور العرض.

عجبك ؟ جرب

 The weather man

نصيحة 360

الفيلم شارك في مهرجان (تورنتو السينمائي الدولي) عام 2015 بكندا.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح