The Definitive Guide to Living in the Capital , Cairo , Egypt

Edge of Tomorrow

Edge of Tomorrow: الفيلم الفيديو جيم!

  • إيملي بلنتبيل باكستون...
  • إثارةثلاثي الأبعاد...
  • دوج ليمندوج ليمن
  • في1 Cinema
تم التقييم بواسطة
Mohamed Hamdy
قيم
قيم الآن
Edge of Tomorrow: الفيلم الفيديو جيم!

بمجرد انتهائنا من مشاهدة الفيلم، تولد عندنا شعور أننا كنا فى لعبة Video Game كبيرة بحجم شاشة السينما! ومش ناقص غير أذرع التحكم علشان نعيش جو اللعب بالكامل! لكن هل ده شىء كويس؟

الحقيقة أننا ما حسيناش بالضيق، بالعكس حسينا بالإبهار والدخول فى تجربة سينمائية جديدة ومختلفة، بداية بأسلوب العرض بتقنية 3D اللى حسينا أنها من المرات النادرة اللى يستحق فيها الفيلم أنه يُعرض بالتقنية دى، وأن العرض ما كانش لمجرد تحصيل أسعار تذاكر مرتفعة والسلام!

الفيلم اللى أخرجه دوج ليمان، وقام ببطولته توم كروز وإيميلي بلانت وبيل باكستون، بـ يحكي عن أحداث مستقبلية، عن الملازم كيج اللى بـ يتهرب طوال الوقت من المشاركة فى المعارك والخطوط الأمامية للاشتباكات، لكنه بـ يلاقى نفسه مجبر على المشاركة فى معركة مع كائنات فضائية على شواطئ فرنسا، المعركة اللى بـ تنتهى بمقتله، قبل ما بـ يقدر يرجع ثانى للنقطة الأولى ويبدأ من أول وجديد بعد ما بـ يكتسب الخبرة من مقتله فى المرة السابقة.. وهكذا.

الأسلوب ده بـ يفكرنا طوال الوقت بأسلوب الألعاب الإلكترونية، حيث يبدأ اللاعب من الصفر ويبدأ يطور قدراته ومهاراته مع الوقت لحد ما يوصل للمستوى المطلوب من الاحتراف لمقابلة الوحش! وده بالضبط اللى بـ يحصل فى الفيلم طوال الوقت، حتى أسلوب التصوير بـ يقترب جدًا من أسلوب الـ One man shooting اللى بـ نشوفه فى كثير من الألعاب الإلكترونية.

نيجي بقى لثلاثة عوامل مهمة كانت رائعة فى الفيلم.. تقنية العرض الأكثر من رائعة، والديكورات اللى خليتنا نعيش كل تفاصيل الفيلم من البداية للنهاية، والموسيقى التصويرية اللى كانت متناسقة مع الأحداث والمشاهد بشكل كبير ومتميز.

الأداء التمثيلى لإيميلى بلانت كان باهت بعض الشىء، وحسينا أنها ما طلعتش كل التفاصيل اللى عندها، خصوصًا أن ممكن طبيعه الدور بحد ذاته خليت استعمالها لأدواتها كممثلة أقل بعض الشىء من دور زى دور بيل باكستون اللى فى اعتقادنا كان أقوى وقدر يسرق الكاميرا من بلانت، أما عن توم كروز فأداؤه بـ يزداد عبقرية وقوة يوم بعد الآخر، وبـ يثبت طوال الوقت أن الوسامة ممكن تفتح أبواب النجاح، لكن الاستمرار على القمة بـ يحتاج لكثير من الموهبة وكثير من العمل وكثير من المجهود، وده اللى بـ يثبته كروز يوم بعد الثانى من خلال اختياره لأدواره بالإضافة لقدراته الجسدية (توم كروز عنده حوالى 53 سنة) لتنفيذ مشاهد الأكشن واللى قدر يقنعنا من خلالها على قدرته على تنفيذ المشاهد دي.

Edge of Tomorrow من أفضل أفلام الخيال العلمى فى الموسم الحالى، رغم انتماؤه بالأساس لعوالم الألعاب الإلكترونية، وننصح بمشاهدته لمحبى الأفلام أو الألعاب على حد سواء!

عجبك ؟ جرب

Gravity.

نصيحة 360

لمزيد من المتعة، ننصحكم بمشاهدة الفيلم بتقنية IMAX.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح