The Definitive Guide to Living in the Capital , Cairo , Egypt

مكافحة المجرمين – Gangster Squad

Gangster Squad: عالم حرب العصابات

  • إيما ستونريان جوسلنج...
  • روبن فليشر
تم التقييم بواسطة
Mohamed Hamdy
قيم
قيم الآن
Gangster Squad: عالم حرب العصابات
أهلاً بكم فى لوس أنجلوس… لوس أنجلوس فى زمن العصابات حيث “ميكى كوهين” هو الكل فى الكل… تجارة مخدرات ودعارة وكل ما هو قانونى وغير قانونى بـ يحصل فى السر والعلن وبمساعدة رجال الشرطة الفاسدين وبسبب خوف رجال الشرطة غير الفاسدين.
أهلاً بكم فى لوس أنجلوس.. مجموعة من ضباط الشرطة الشرفاء، بمساعدة عشيقة “ميكى كوهين” بـ تحاول توقع الأخير فى شر أعماله، بالقانون، أو حتى بدون قانون، السؤال اللى كل أبطال الفيلم بـ يطرحوه خلال الأحداث: هل من حق رجل القانون أنه يخرج بره سياق القانون لبعض الوقت علشان يحقق أهداف تدور كلها فى إطار القانون؟
أهلاً بكم فى لوس أنجلوس.. المخرج روبن فليتشر وريان جوسلينج وإيما ستون وأنتونى ماكى وشون بن العظيم المبهر بـ يقدموا فيلم عصابات (قديم/ جديد) عن حروب العصابات فى مدينة الملائكة ومدى تقيد رجال القانون بالقانون.

الفيلم فى مجمله مش بـ يقدم لنا حاجة جديدة عن عالم العصابات والتصدى لها، القصة مكررة فى أكثر من عمل أدبى وفنى آخر، لكن كان عندنا بعض الفلتات زى مثلاً أداء الرائع شون بن اللى قدر يغير شخصيته بالكامل ويظهر بصورة رجل عصابات أمريكى حقير بالمعنى الحرفى للكلمة.
البطولة النسائية لإيما ستون كانت ممتازة رغم وقوف الرقابة المصرية ضدها فى كثير من المشاهد اللى تم اقتطاعها بالكامل.

الديكور لازم نتكلم عنه، لأننا ما حسيناش أننا خرجنا من حقبة أمريكا أيام سيطرة العصابات عليها ولو لحظة واحدة، وظهرت عبقرية الديكورات فعلاً فى المشاهد الأخيرة فى الفندق اللى عايش فيه ميكى كوهين واللى تحول لقطعة من الجحيم بعد الإخراج المتميز لمشاهد الأكشن، رغم أنه أظهر رجال الشرطة والقانون فى بعض الأحيان فى صورة الرجال الخارقين اللى ما حدش يقدر يلمسهم.

لو بـ تحب أفلام العصابات والأكشن المتعلق بها والمدافع الرشاشة القديمة الضخمة والسيارات العتيقة اللى بـ تنقلب وتنفجر على قارعة الطريق Gangster Squad هـ يكون فيلم مثالى بالنسبة لك، أما لو بـ تدور على حاجة مختلفة ننصحك تتابع باقى المقالات النقدية وتشوف فيلم مناسب أكثر لك.

عجبك ؟ جرب

سلسلة أفلام The God father.

نصيحة 360

فى موقع IMDB العالمى المتخصص فى السينما حصل الفيلم على تصويتات بمتوسط 7 من 10، وقام بالتصويت أكثر من 32 ألف مستخدم حول العالم حتى لحظة كتابة السطور دي.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح