The Definitive Guide to Living in the Capital , Cairo , Egypt

Happy New Year

Happy New Year: شاروخان يضرب مجددًا

  • أنوراج كاشياببومان إيراني...
  • إثارةإستعراضي
  • فرح خانفرح خان
  • في1 Cinema
تم التقييم بواسطة
Mohamed Hamdy
قيم
قيم الآن
Happy New Year: شاروخان يضرب مجددًا

"واد شقي على برنس… شجاع على طيب… مُخلص.. مافيش حاجة تقف أمام حبه، خرافى أسطوري، واد من الآخر مبهر وساحر".

ده كان وصف ماجد الكدواني لما كان بـ يلعب شخصية المارد اللى بـ يحول الدكتور بهيج (أحمد مكي) من شخصية لأخرى فى الفيلم الشهير "طير أنت"، واللى كلنا عارفين أن بهيج تحول بعدها لشخص هندي! والحقيقة أن الهنود فى كل أعمالهم الفنية بـ يراعوا أن البطل يكون فيه كل الصفات دي… أو أزيد.. وده اللى حصل مع Happy New Year.

من إخراج فرح خان فى ثالث تعاون بينها وبين الممثل شاروخان، بـ نشوف قصة عن محاولة مجموعة من الأشخاص الانتقام من الشرير اللى قتل والد صديقهم تشارلي، الأمر اللى بـ يقودهم للاشتراك فى مسابقة الرقص العالمية اللى بـ تقام فى مدينة دبي، وسط عاصفة من المواقف الكوميدية ومشاهد الأكشن والاستعراض والغناء والرقص!

الجملة الأخيرة فى الفقرة اللى فاتت صحيحة، الفيلم بـ يجمع بين الأكشن والكوميديا، الرقص والاستعراض، الإثارة والتشويق.. فى مزيج غريب مش بـ يقدر عليه إلا بوليوود وأعاجيبها الفنية اللى ما تزيدش عن أعاجيب الهند كدولة فيها كل شىء حتى المتناقضات.

بما أننا بـ نتكلم عن دولة الهند، شعرنا من خلال أحداث الفيلم وكلمات الأغاني والاستعراضات حالة من الانتصار للهند والهنود، وده ظهر بوضوح فى مشاهد الاستعراضات المشتركة مع الفريق الكوري، ومشهد إنقاذ شاروخان للطفل المشارك فى الاستعراضات، ومن قبلها إنقاذه لقائد الفريق الكوري، كلها حالات من الانتصار الشعبى للبطل الهندي، وإظهار الهند –وأهلها- على أنهم الأكثر شهامة وتعاونًا وأصالة، حاجه كده بـ تفكرك بالأفلام اللى بـ تنتصر للنزعة المصرية، وإزاى إحنا أحسن ناس فى العالم وكده!

شاروخان قادر على إثبات أن قوة التمثيل مش بالسن (50 سنة)، قدراته فى الرقص والاستعراض مذهلة، والفيلم وطوال مدة عرضه أتاحوا له الفرصة لإبراز مواهبه للنهاية، وباقى فريق العمل سواء كان أنوراج كاشيابأو بومان إيراني، وطبعًا الجميلة ديبيكا بادوكن قدروا يقوموا بأدوارهم على أفضل ما يكون، قد يكون هناك بعض الخلل فى السيناريو اللى كان بـ يتأرجح بين قمة التفاهةأحيانًا وقمة التراجيديا فى أحيان ثانية، لكن نقدر نعلل ده بالرغبة فى إرضاء كل الأذواق والأطراف.

من الأمور اللى عجبتنا كمان فى الفيلم عدم وجود أى مشاهد خليعة أو أمور تخدش الحياء، هو فيلم مناسب لجميع أفراد الأسرة، وفى نفس الوقت مش تافه أأو سطحي، على الرغم من وجود عناصر كان ممكن يتم استخدامها بشكل إباحي زى شاروخان كممثل له مكانة كبيرة فى قلوب البنات، أو القصة الرومانسية فى الفيلم، لكن واضح أن السيناريو كان ملتزم بشكل كبير بسيناريو فيلم زي The Italian Job، حتى فى التشابه فى اسم شخصية البطل فى العملين، وشوفنا كمان بعض الاقتباسات من سلسلة أفلام Ocean Eleven، لكن لا تصل لمستوى السرقة الفنية، لكن ممكن نعتبرها كنوع من أنواع الإهداء الفني.

Happy New Year فيلم هندي من الطراز الأول، بـ يحاول يجمع كل شىء فى عمل واحد، ونجح إلى حد كبير فى الوصول لهدفه، نرشحه لكم للمشاهدة فى حالة إذا كنتم مش بـ تزهقوا من الأفلام الطويلة، أو لو كنتم من محبى شاروخان، أو من محبى الأفلام الهندية بشكل عام.

عجبك ؟ جرب

My name is khan.

نصيحة 360

الفيلم مدته بـ تتجاوز الثلاث ساعات، الناس اللى مش بـ تحب تقعد كثير فى السينما لازم تأخذ بالها من المعلومة دي.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح