The Definitive Guide to Living in the Capital , Cairo , Egypt

أفلام
Iron Man 3

Iron Man 3: النحت الهوليودى

  • جاي بيرسجوينث بلترو...
  • إثارةحركة ومغامرات...
  • شين بلاكشين بلاك
  • في1 Cinema
تم التقييم بواسطة
Mohamed Hamdy
قيم
قيم الآن
Iron Man 3: النحت الهوليودى

واحدة من أكبر مشكلات هوليود هى أنها أول ما بـ تستشعر نجاح كبير لأحد أفلامها بـ تبدأ فى إعادة إنتاجه بتقديم أجزاء جديدة منه، واللعب على كافة التيمات الممكنة للعب عليه –وغير الممكنة كمان– فى سبيل جمع أكبر قدر ممكن من الربح المادى واستثمار نجاح الأجزاء الأولى من الأعمال اللى بـ تقدمها.

لما تكون الأجزاء الثانية على نفس المستوى من القوة الفنية بـ يكون ده مكسب للمشاهد، كلنا فاكرين سلسلة أفلام الأب الروحى The Godfather على سبيل المثال واللى بـ يختلف عشاقها حول مدى قوة الجزء الثانى منها عن الجزء الأول، مع اتفاق شبه صريح بضعف باقى الأجزاء، أما مع تطور تقنيات العرض السينمائى أصبح تقديم أجزاء جديدة من الأفلام لا يحمل فى طياته أى جديد سوى زيادة الإبهار زى ما حصل مع Iron Man.

فى رأينا أن المخرج شين بلاك ما عملش أكثر من اللعب على نفس التيمة لكن بتقنيات أكثر إبهارًا بكثير، ساعده عليها تطور تقنيات الـ 3D والـ Imax اللى ساعدته على تقديم صورة غاية فى الإبهار والوضوح، مع خدع سينمائية وجرافيكية عالية جدًا، أبهرت كل المتواجدين فى قاعة العرض، لكن من إمتى كان الإبهار وحده كافى لإنجاح فيلم بالكامل من الألف للياء؟

الفيلم اللى كتب السيناريو له درو بيرس بـ يحكى عن مغامرة جديدة من مغامرات تونى ستارك (روبرت داونى) فى مواجهة عدو جديد وغامض اسمه الماندرين (بن كنجسلى) اللى بـ ينجح فى تدمير حياة الرجل الحديدى وإرجاعه لمرحلة الصفر من جديد، وبـ نشوف محاولات (تونى ستارك) لإنقاذ نفسه ومجتمعه من المصير المحتوم.

الفيلم بـ يطرح سؤال فى غاية التعقيد: هل صنعت البدلة الحديدية تونى ستارك، أم تونى ستارك هو اللى صنعها؟ المقصود هنا من الصناعة ليس التصنيع، لأننا شوفنا مشاهد التصنيع فى الجزء الأول من السلسلة، لكن المقصود بالصناعة هنا، هل القدرات اللى بـ تقدمها البدلة الحديدية هى الى عملت بطولة تونى ستارك؟ أم أن أخلاقه الشخصية وموقفه من الحياة هو اللى أعطاه القدرة على تطويع البدلة الحديدية لحسابه؟ مش حابين نحرق الجزء ده عليكم لحد ما تشوفوه بنفسكم وتقرروا مين اللى صنع الثانى بنفسكم.

طبعًا الديكورات بمساعدة الخدع السينمائية كان لها نصيب الأسد فى إظهار الفيلم بالمظهر المذهل ده، ويمكن اللى شافوا الفيلم من خلال سينما IMAX هـ يجربوا تجربه جديدة ومختلفة من الإبهار على مستوى الصورة وده من العوامل اللى تحسب لصانعى الفيلم قدرتهم على تقديم إبهار بصرى جديد ومختلف.

الموسيقى التصويرية هى كمان كان لها دور مهم، وكانت بـ تتصاعد مع الأحداث بترتيب احترافى جميل ساعد على دخول المشاهدين لروح الأحداث.

لو كنت من عشاق سلسلة Iron man هـ يمثل لك الفيلم تجربة جديدة وممتعة، أما لو بـ تتفرج على الفيلم للمرة الأولى ننصحك ترجع للأجزاء السابقة من السلسلة علشان تعرف بعض الترابطات الهامة، ومنتظرين رأيكم فى التعليقات.

عجبك ؟ جرب

الجزء الأول والثانى من نفس السلسلة.

نصيحة 360

اشتريت شركة ديزنى حقوق توزيع الفيلم من شركة بارامونت مقابل 115 مليون دولار، الصفقة تضمنت أيضًا فيلم The Avengers، والتى سيظهر لوجو بارامونت على الفيلم وفقًا لشروط الصفقة، ومن المتوقع ألا يظهر اسم ديزنى إلا فى الجزء النهائى من تتر الفيلم.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح