The Definitive Guide to Living in the Capital , Cairo , Egypt

من الأمور اللى ندمنا عليها فى مشاهدة الفيلم أن حظنا وقعنا فى سينما داون تاون فى 8 شارع عماد الدين، الحقيقة أن مستوى السينما والعاملين فيها أقل من المتوقع بكثير رغم الإقبال عليها، بداية من موظفين الشباك اللى تعاملوا معانا بأسوأ معاملة ممكنة علشان ما رضيناش ندفع لهم بقشيش وإجبارهم لباقى المشاهدين على الدفع، نهاية بمستوى السينما الفنى نفسه من حيث جودة الصورة والصوت وحجم الشاشة وباقى عناصر المكان.

من بطولة كريس باين، وكيرا نايتلي، كيفين كوستنر ومن إخراج كينيث براناه بـ نشوف قصة الضابط السابق فى الجيش الأمريكى: جاك ريان اللى بـ يصاب إصابة بالغة فى الحرب فى أفغانستان، بـ يتم إبعاد جاك عن المجال الحربى وبـ يشتغل فى مجال تحليل المعلومات المالية لحساب الـ CIA، إلا أن الأكشن فى حياته مش بـ ينتهى، بالعكس..

مهنته الجديدة بـ تستلزم أنه ينخرط فى عملية استخباراتية لمنع هجمات روسية إرهابية ضد الولايات المتحدة على خلفية خلاف اقتصادى بين البلدين، بـ يسافر جاك فى مهمة تجسسية بـ تتحول لمأساة تراجيدية بـ تستلزم منه استخدام مهاراته السابقة علشان يمنع هجوم إرهابى انتحارى ضد الولايات المتحدة.

الحقيقة أن الفيلم بداية من المشاهد الافتتاحية بـ يخطفنا فى حالة من مشاهد الأكشن المستمرة وغير المنقطعة على طول خط الأحداث، وواضح جدًا بصمة الكاتب توم كلانسى اللى بـ يعتبر واحد من أكثر المخلصين لفكرة الأكشن والقصص المبنية على الصراع بين الدول والكيانات الكبرى، واللى بـ نشوفها فى الأفلام وألعاب الفيديو المعتمدة على قصصه المليئة بالأكشن والمفاجآت.

مشكلتنا الوحيدة مع الفيلم أن الإخلاص للأكشن ضيع حاجات كثير جدًا، فى رأينا كان ممكن تسليط الضوء على العلاقة بين الزوجين بشكل أقوى من مجرد إخفاء جاك حقيقة شغله عن زوجته، أو استعانته بها بعد كده للوصول للإرهابى الروسى، وكان ممكن نشوف مشاهد أكثر رومانسية أو حتى أكثر تراجيديا من كده لكن زى ما قولنا الإخلاص للأكشن كان أكثر من أى شىء ثانى.

الموسيقى التصويرية والديكور كانوا متناسبين مع الفيلم، ديكورات غرفة الفندق اللى حصل فيها المعركة كانت كويسة، لكن ديكورات الشركة الروسية كان المفروض يكون أكثر فخامة من اللى شوفناه على الشاشة، أما الموسيقى التصويرية كانت أحيانًا بـ تروح بعيد عن مشاهد الأكشن المستمرة على طول الخط الدرامى، وكانت بـ تكون أقل أحيانًا فى بعض المشاهد الثانية، لكن بشكل عام كان مستواها متناسب مع الفيلم.

Jack Ryan: Shadow Recruit فيلم أكشن خفيف لو بـ تدور على بعض الأكشن اللى تضيع فيه حوالى ساعتين من الزمن، مع ضمان عدم وجود ألفاظ أو مشاهد مخدرات أو إباحية يعنى ممكن أى حد مراهق يدخل الفيلم بدون قلق أو خوف.