The Definitive Guide to Living in the Capital , Cairo , Egypt

ثبت بالدليل القاطع أن أفلام الرعب الهوليوودية مش بـ تعجبنا، وبـ نحس أنها بالكامل عبارة عن مجموعة من التيمات المملة والمكررة واللى بـ يُعاد تقديمها فيلم بعد فيلم، فقط للدفع بإصدار جديد للسينمات، ولاستغلال جيوب المشاهدين الباحثين عن جرعة من الرعب حتى لو كانت مكررة ومعادة.

فيلم Jessabelle بـ يروح لأبعد من كده كمان، لأنه فى الأساس مش بـ يقدم الرعب بمعنى الرعب، لكنه بـ يقدم مجموعة من المشاهد المعتمدة على "خض" الجمهور واللعب على جهازهم العصبي، الأمر اللى بـ يتحول لعادة بعد عدة مشاهد، ومع نهاية الربع الأول من الفيلم بـ يفقد المشاهد أي إحساس بالرعب وبـ يتبقى عند بعض المشاهدين –زينا– إحساس بالسخط على التجربة السينمائية كلها.

من تأليف روبرت بن جارانت وإخراج كيفين جيروتارت بـ نشوف (سارة سنوك) فى دور جيسي، الفتاة الشابة اللى بـ تتعرض لحادثة ضخمة وهي بـ تستعد للانتقال فى منزل حبيبها، الحادثة اللى بـ تغير حياتها وبـ تخليها تفقد القدرة على السير مؤقتًا، الأمر اللى بـ يضطرها للاتصال بوالدها لنقلها من المستشفى، خاصة أنها ما أصبحش عندها مأوى حاليًا.

مع انتقالها للحياة مع والدها، ومع غرابة أطواره، بـ تبدأ جيسي فى استكشاف المنزل وبـ تعثر على مجموعة من شرائط الفيديو اللى سابتها لها والدتها قبل وفاتها، الشرائط اللى بـ تغير حياتها للأبد وبـ تخليها تبدأ تشوف كائنات ما ورائية وأحداث –المفروض– أنها مرعبة.

زى ما قولنا الرعب فى الفيلم معتمد على المشاهد المفاجئة، الأسلوب الأسهل فى أفلام الرعب، واللى بـ يعتمد عليه أى مخرج عاوز يقدم للسوق فيلم مستهلك آخر والسلام، وده اللى حصل مع Jessabelle، وللأسف أى محاولة للإثارة فشلت تمامًا، للدرجة اللى جعلتنا مستنتجين أحداث خصوصًا فى الربع الأخير اللى كان –المفروض– بـ يحمل كل جرعة الإثارة فى الأحداث.

الموسيقى التصويرية كانت تقليدية وما قدمتش أى جديد، لكن الديكورات والمشاهد الواسعة كانت متميزة لكنها كانت قليلة جدًا، أما المؤثرات الخاصة والخدع، اللى المفروض يعتمد عليها أى فيلم رعب بالمقام الأول كانت ضعيفة جدًا وغير متقنة على الإطلاق.

Jessabelle فيلم رعب ضعيف ومستهلك، شوفوه لو بس كنتم من عشاق أفلام الرعب مهما كانت درجة ضعفها!