The Definitive Guide to Living in the Capital , Cairo , Egypt

على الرغم من أن فكرة الفيلم مستهلكة، وشوفناها فى أفلام كتيرة بداية من Desperado وحتى payback ومرورًا بعدد كبير من الأفلام الآخرى، إلا أن أسلوب التصوير والديكور والموسيقى التصويرية، كانت العوامل المميزة لفيلم (جون ويك)، الفيلم اللي أخرجه ديفيد ليتش و تشاد ستاهلسكي وقام ببطولته كيانو ريفز.

الفيلم بـ يحكي عن (جون ويك)، المشاهد الافتتاحية للفيلم بـ تورينا قد إيه كان إنسان ضعيف ومُحطم بعد وفاة زوجته، وازاي بـ يحاول يتأقلم مع حياته بدونها، بمساعدة كلب صغير لطيف، بـ تهديه له زوجته قبل وفاتها. لكن هل القدر ممكن يسيبه فى حاله؟!

الإجابة اللي كلنا عارفينها هى بالتأكيد.. لا.. جون ويك بـ يتعرض للضرب والسرقة بالإكراه وقتل الكلب بتاع زوجته من قبل مجموعة من العصابات اللي بـ تمتلىء بها المدينة. الأمر اللي بـ يصحي جواه روح الإجرام اللي كان سابها بعد ارتباطه بزوجته. ومن هنا بـ نكتشف وجه آخر من وجوه جون ويك.

مش عاوزين نحرق عليكم الأحداث، لكن الفيلم بعد كده بـ يتعرض لمحاولة انتقام جون ويك من اللي حاولوا يأخدوا منه البقية الباقية من حياته، وبـ نكتشف أن ويك مجرم عتيد الإجرام وله سمعة قوية فى عالم الجريمة وله صلات أقوى بأحد الفنادق اللي بـ تأوي المجرمين فى المدينة بقوانين صارمة ومحددة.

صناع الفيلم كانوا مخلصين لفكرة البطل الخارق اللي مش بـ يعرف يوقفه أي عائق أو أي شخص، نفس الأسلوب ده فى تقديم الشخصيات شوفناه فى أعمال كثير بـ يحضرنا منها Payback، اللي قام ببطولته ميل جيبسون واللي بـ يحكي عن محاولة مجرم سابق الانتقام من العصابة، اللي كانت السبب فى إصابته واقترابه من الموت، ومحاولته لاستعادة حوالي 35 ألف دولار أخدتهم منه العصابة، الأمر اللي كان بـ يتسم بالتفاهة زى ما قتل الكلب وسرقة السيارة كانت أسباب واهية تدفع (جون ويك) للانتقام، ومن الواضح أن تيمة الانتقام الدامي لاسترجاع حق بسيط، أصبحت تيمة مفضلة عند صناع أفلام هوليود مؤخرًا.

أسلوب التصوير ومشاهد الأكشن اللي استمتعنا فيها بحركة الكاميرا والتنويع بين المشاهد السريعة والبطيئة، بالإضافة للخدع السينمائية، كلها كانت من عوامل قوة الفيلم، لكن الموسيقى التصويرية بالذات تميزت بالقوة والحداثة وأنها وضعتنا فى جو الأكشن الموجود فى الفيلم بشكل أكثر من رائع، الأمر اللي دفعنا للبحث عن تراكات المزيكا الخاصة بالفيلم بعد ذلك.

الأداء التمثيلي لكيانو ريفز كان متميز، لكن فى كثير من المشاهد كنا بـ نحس بعدم التناسق بين شكل جسده الرفيع وبين  أداؤه لمشاهد الأكشن أيضًا الربع الأخير للفيلم كان فيه قدر من المبالغة واظهار شخصية جون ويك بشخصية لا تقهر، ويمكن فكرنا اظهار الشخصية بالمنظر ده بشخصية (أدهم صبري) أو (رجل المستحيل) اللي كنا بـ نقرأها زمان عن ظابط مخابرات خارق القدرات.

جون ويك فيلم يستحق المشاهدة من كل عشاق الأكشن وأفلام البطل الواحد، ولكل عشاق كيانو ريفز بشكل عام.