The Definitive Guide to Living in the Capital , Cairo , Egypt

Killing Them Softly

Killing them softly: أمريكا تنهار!

  • براد بيتراي ليوتا...
  • إثارةدراما
  • أندرو دومينيكأندرو دومينيك
  • في1 Cinema
تم التقييم بواسطة
Mohamed Hamdy
قيم
قيم الآن
Killing them softly: أمريكا تنهار!
المشكلة فى فيلم Killing them softly أنك لازم تكون أمريكى علشان تقدر تفهم أحداثه بنسبة 100% أو على الأقل محتاج تكون “مذاكر” المجتمع الأمريكى والأزمة الاقتصادية الأمريكية اللى حصلت مؤخرًا كويس علشان تقدر تستمع بأحداث الفيلم.
سام شيبرد، وبراد بيت، وعلى رأسهم المخرج أندرو دومينيك بـ يحاولوا يقدموا لنا فيلم عن المجتمع الأمريكى من الداخل من خلال قصة السطو على لعبة بوكر من قبل عصابة، ومحاولة تلفيق الجريمة لشخص آخر، ثم محاولة انتقام لاعبى البوكر من اللصوص الأصليين.
قصة تقليدية “اتهرست” فى ألف فيلم قبل كده، لكن المرة دى فيه كثير من الإسقاطات على الأوضاع السياسية والاقتصادية للولايات المتحدة، طوال الوقت بـ نسمع خطب لجورج بوش وأوباما وتعليقات متخصصين فى الأوضاع الاقتصادية تعليقًا على الأزمة الاقتصادية الأمريكية، خصوصًا فى مشهد البداية اللى ربط بين خطاب أوباما وبين تترات الفيلم بشكل أزعجنا شخصيًا وخلانا نصاب بـ “الزغللة”.

بعض المشاهد بالغ المخرج فى عرضها بالسرعة البطيئة مع خلفية موسيقية أوبرالية، المشاهد ما كانتش بالقوة اللى تستحق أنه يتم التركيز عليها بالشكل ده، ناهيك أنها مشاهد دموية ممكن تضايق المشاهدين ذوى الإحساس المرهف، وبعض الأحداث المتوقعة للفيلم أصابتنا بالملل إحنا ومعظم رواد السينما اللى انتبهنا أن بعضهم كان نايم فى  الربع الأخير من الفيلم (بجد مش هزار)، وبالطبع حالة التذمر اللى لمسناها من الجمهور بعد انتهاء الفيلم، وحملات التريقة اللى بـ تشنها شلل الأصحاب على الصديق اللى اقترح عليهم مشاهدة الفيلم.

الموسيقى التصويرية ما كانتش بالقوة اللى كنا متوقعينها، وبشكل عام مستوى الفيلم كان أقل من المتوسط بمراحل، وفى اعتقادنا أن ده بسبب أننا مش متعمقين فى دراسة الأزمة المالية الأمريكية لأن الموضوع مر علينا فى مصر مرور الكرام مع أحداث سياسية واجتماعية أهم كانت بـ تدور فى المرحلة دى.
فى النهاية.. ما ننصحكش تخش الفيلم ده إلا لو كنت خبير اقتصادى، أو عاوز مكان هادئ ومظلم لمدة ساعة ونصف علشان تنام شويه وتستريح من يوم عمل طويل!

عجبك ؟ جرب

Lord of the War.

نصيحة 360

الفيلم تكلف 18 مليون دولار أمريكى، هل هـ يقدر يحقق مكاسب ضخمة زى ما توقع صانعيه أم أنه هـ يحقق تكاليف إنتاجه بصعوبة؟ شوف الفيلم وجاوبنا بنفسك.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح