The Definitive Guide to Living in the Capital , Cairo , Egypt

الحقيقة أننا من محبى أفلام الجاسوسية والمنظمات اللى ما حدش يعرف عنها حاجة، الجو العام للسرية والأكشن المختلط بالعملاء اللى مش بـ يغلطوا واللى بـ ينفذوا عمليات سرية فى كل مكان فى العالم بدون ما أى حد يعرف عنها أى شىء، العالم ده كله بـ يثير جوانا حالة من الحماسة مش بـ نحس بها غير مع كل فيلم جديد من أفلام الجاسوسية، وده اللى حصل لنا مع فيلم kingsman اللى من تأليف وإخراج ماثيو فون، وبـ يحكي عن أحد العمليات الاستخباراتية اللى بـ تقوم بها منظمة شديدة السرية، من خلال تجنيد ابن أحد العملاء السابقين بها، وهو مراهق جامح مافيش أى حاجة بتوقفه عن تحقيق أهدافه، بـ يتم تجنيده لصالح الإيقاع بعالم مجنون بـ يخطط لتهديد العالم بالكامل!

بطولة الفيلم كانت من نصيب كولين فيرث اللى أدى أكثر من 80% من مشاهد الأكشن بنفسه بدون الاستعانة بدوبلير، ومارك سترونج وصامويل جاكسون اللى قام بدور متميز ومختلف ويضاف لسلسلة الأدوار الجديدة واللى بـ يقوم بها الفنان المتمكن من اختياراته وأسلوبه الخاص فى الأداء.

الديكورات والموسيقى التصويرية لعبت دور مهم جدًا فى الفيلم، وتناغمت مع المؤثرات الخاصة اللى ظهرت بداية من طريقة كتابة الأسماء على تترات بداية الفيلم وحتى آخر لحظة من لحظات الفيلم، بالإضافة للموسيقى اللى كانت أرستقراطية وفخمة بما يتناسب مع فيلم جاسوسية ولا يتناسب مع فيلم أكشن، الأمر اللى أعاد لنا ذكريات قديمة مع أفلام جيمس بوند واللى كانت موسيقاها التصويرية مختلفة عن المستوى الفنى للأفلام نفسها، الفيلم نفسه بـ يحمل العديد من الإشارات والإيحاءات المهداة لأفلام جيمس بوند، منها على سبيل المثال From Russia with love واللى يعتبر من أكثر أفلام بوند تميزًا.

The Secret Service فيلم جاسوسية وحركة وتشويق، وبـ نرشحه للمشاهدة كفيلم حركة خفيف قادر على تذكيرنا بعوالم جيمس بوند ومنظمات التجسس السرية.