The Definitive Guide to Living in the Capital , Cairo , Egypt

Life of Crime

Life of Crime: فيلم ممل رغم جودة الفكرة

  • تيم روبينزجينفر أنيستون...
  • إثارةكوميدي
  • دانيل شيشتردانيل شيشتر
  • في1 Cinema
تم التقييم بواسطة
Mohamed Hamdy
قيم
قيم الآن
Life of Crime: فيلم ممل رغم جودة الفكرة

بما أن الكلام زاد مؤخرًا عن السرقات الفنية والأدبية، ماسورة من الاتهامات اتفتحت على مواقع التواصل الاجتماعي بـ تتهم مؤلفين وفنانين مصريين بالسرقة من الأجانب، سواء فى الروايات أو الأفلام أو غيرها، لكن ما حدش بـ يركز فى السرقة العكسية، على كل حال نقدر نعتبر أن Life of Crime إهداء لكل اللى عندهم لبس بين الاقتباس والسرقة الفنية.

من تأليف وإخراج دانييل شيكتر بـ نشوف إزاى بـ تتعرض ميكي داوسون (جنيفر أنستون) للخطف بهدف الضغط على زوجها الثرى لدفع فدية ضخمة، اللى مش بـ يعرفه الخاطفين أن العلاقة بين الزوج والزوجة مضطربة، وأنهم على وشك الطلاق، وأن الزوجة بـ تتعرض لخيانة زوجها، الأمر اللى بـ يهدد العملية كلها بالإجهاض نتيجة عدم اهتمام الزوج بدفع الفدية والإفراج عن زوجته.

ليه بـ نتكلم هنا عن السرقة الأدبية؟ لأننا افتكرنا بمجرد معرفة الفكرة الأساسية للفيلم بمسرحية قديمة للفنان فؤاد المهندس، اسمها كان “روحية اتخطفت” وكانت بـ تتكلم عن زوجة بـ تتخطف وزوجها مش بـ يتعاون مع الخاطفين لأنه بـ يكره زوجته، وبـ يرفض دفع الجزية للخاطفين، ونعتقد أننا شاهدنا فيلم قديم لسمير صبري وسماح أنور فى فترة التعاون الذهبي بينهما، وكان برضه بـ يناقش نفس القضية، ومن هنا بـ يظهر مفهوم الفرق بين السرقة والاقتباس، والفرق بين القصة والتيمة، وهى فروقات ضخمة.

على الرغم من جودة الفكرة، إلا أننا شعرنا بملل شديد، وعلى الرغم من حرص المخرج على الاعتماد على الصدف فى القصة، إلا أنه فشل تمامًا فى حبس أنفاسنا على مدار الخيط الدرامي للأحداث، ومن ملاحظتنا للموجودين فى قاعة السينما، وإزاى كانوا مهتمين باللعب فى هواتفهم المحمولة أكثر من متابعة الأحداث، عرفنا أن الملل ما كانش من نصيبنا إحنا بس!

جنيفر أنستون بـ تثبت فى كل عمل بـ تقوم به، قدرتها على التكيف التام مع الشخصية اللى بـ تؤديها، صحيح السن بدأ يرسم علاماته على وجهها، إلا أنها لسه قادرة تحتفظ بلمسة جمالية، وقادرة تحافظ على الطفلة فى شخصيتها بشكل كبير، صحيح مش قادرة تخرج بره شخصيتها الأصلية، واللى باهتة بشكل كبير على دورها كزوجة رجل ثري، إلا أن ده يحسب لصالحها فى النهاية وفى قدرتها على تقمص الشخصية بشكل أساسى.

الديكورات والملابس قدرت تنقلنا لجو الماضى اللى بـ تدور فيه الأحداث، بداية من طرازات السيارات الضخمة وديكورات المنازل اللى كانت منتشرة أيامها، قصات الشعر بالنسبة للرجال والسيدات واختياراتهم فى الملابس وغيرها من الأمور، كلها كانت متسقة جدًا مع السياق الدرامي للفيلم.

الموسيقي التصويرية على الرغم من تميزها، إلا أننا ما حسيناش أن كان لها تأثير كبير على الأحداث، ومش فاكرين مشهد بعينه حسينا فيه أن الموسيقى تصدرت واجهة المشهد أو لعبت دور كبير فى سياق الأحداث، وكنا نتوقع دور أكبر من كده للموسيقى بشكل عام لكن دورها كان محدود.

Life of Crime فيلم يصلح للمشاهدة فى نهاية الاسبوع، لو كنت من محبى الأفلام المعتمدة على الصدف الدرامية، أما لو كنت من المشاهدين اللى بـ يزهقوا بسرعة، ننصحك تدور فورًا على فيلم آخر تتفرج عليه.

عجبك ؟ جرب

Pulp Fiction .

نصيحة 360

الفيلم اللى بـ يمتد على مدار حوالى ساعة ونصف، شارك فى مهرجان أبو ظبي فى دورته السابعة سنة 2013.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح