The Definitive Guide to Living in the Capital , Cairo , Egypt

حياة بي – Life of Pi

Life of Pi: إنسان ونمر وقارب!

  • إرفان خانسوراج شارما...
  • حركة ومغامراتدراما
  • آنج ليآنج لي
  • في1 Cinema
تم التقييم بواسطة
Mohamed Hamdy
قيم
قيم الآن
Life of Pi: إنسان ونمر وقارب!
بصراحة شديدة الشعور الأول لما سمعنا أن الفيلم بـ يحكى على مدار ما يقرب من ساعتين عن ولد مراهق ونمر على متن قارب حسينا أننا هـ نشوف فيلم ممل ومغرق فى المشاهد الفلسفية والحاجات اللى مش بـ نحب نتفرج عليها فى الأفلام، لكن بعد مشاهدته أدركنا أننا لازم نعيد النظر ألف مرة فى التقييم القائم على الـ Trailer أو المؤشرات المبدئية لأى فيلم.

ابن مدير حديقة حيوان فى الهند بـ يلاقى نفسه محاصر مع نمر وحمار وحشى وقرد على متن قارب نجاة بعد غرق السفينة اللى كانت بـ تنقله هو وأهله وكل حيوانات الحديقة فى عرض المحيط الشاسع. تفتكر نسبة نجاحه فى البقاء على قيد الحياة هـ تكون قد إيه؟ بالضبط كده.. إحنا كمان كنا بـ نحسب زيك أن الأمر منتهى وأن المفروض الفيلم يدور على حاجة ثانية يكمل بها الوقت الطويل بتاعه. لكن فى واقع الأمر قدر المخرج “أنج لى” –مش أنجيلينا جولى– أنه يقدم لنا تصور مختلف تمامًا عن اللى دار فى دماغنا ودماغكم.. كانت الرؤية السينمائية له رائعة بشكل مش عاوزين نحرقه عليكم لحد ما تشوفوه بنفسكم.
الإبداع السينمائى ما كانش بس على مستوى الصورة المبهرة والاستغلال الرائع لكادرات التصوير والإضاءة والظلال وكل العوامل اللى تخلى الصورة السينمائية تحفة ولوحة ما تزهقش أبدًا من النظر لها، كمان التمثيل كان أكثر من رائع من أيوش تاندل وعرفان خان وحتى بان مارتيل، كمان عدد الممثلين كان قليل لأن الجزء الأكبر من الأحداث بـ نشوفه مع (Pi) وهو فى سن المراهقة لوحده مع النمر فى القارب.
الفيلم بـ يحمل فى طياته معانى كثيرة أكثر من معانى البقاء على قيد الحياة أو مقاومة الموت وسط المياه المالحة، الفيلم فيه قيم إنسانية وروحانية وحتى خبرة حياتية، هـ تحتاج مننا مساحة  أضخم من مساحة المقال النقدي علشان نتكلم عنها، بالتالى هـ نسيبكم تستنتجوها لوحدكم من خلال الأحداث الشيقة.

آخر حاجتين عاوزين نقولهم: العرض بتقنية الـ 3D ما كانش له أى تأثير يذكر، لكن أصحابنا اللى شافوا الفيلم فى سينما IMAX كانوا منبهرين آخر 14 حاجة.

الحاجة الثانية: همسة فى أذن المنتجين والمخرجين المصريين.. لو سمحتم تفرجوا على الفيلم ده وشوفوا أننا نقدر نصنع سينما زى دى تحقق نجاح جماهيرى ساحق بدون عرى ولا إباحية ولا كوميديا فجة… تعلموا بقى!

عجبك ؟ جرب

Slumdog Millionaire.

نصيحة 360

ما يفوتكش تجربة مشاهدة الفيلم فى سينما IMAX المبهرة.. تجربة مختلفة كليًا.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح