The Definitive Guide to Living in the Capital , Cairo , Egypt

التقدم التكنولوجي لما انعكس على صناعة السينما فى العالم، كلنا شهدنا ثورة حقيقية فى تقنيات العرض، ومستوى صناعة الأفلام، وشوفنا للمرة الأولى شركات عملاقة زي Disney أو Pixar أو Marvel بـ تتحد مع بعض لإنتاج أفلام أنيميشن قوية وعالية المستوى، ومع وصول تجهيزات العرض 3D والـ IMAX للسينمات، الأمر اللى ساعد على ظهور أفلام عظيمة فعلاً على كافة المستويات وعلى مستوى الأنيميشن بشكل خاص.

لكن مين قال أننا أحيانًا مش بـ نحس بحنين للبساطة؟ للتلقائية؟ للأفلام الكارتونية البسيطة اللى بـ تفكرنا بجلوسنا أمام التليفزيون نهار يوم الجمعة فى انتظار الفقرات الكارتونية اللى بـ تعرضها القنوات الأولى والثانية الأرضية (قبل انتشار الستالايت والإنترنت طبعًا)، وهو ده الوتر اللى بـ يلعب عليه فيلم Maya the Bee.

سواء بقصد أو بدون، قدر المخرجان ألكسيس ستادرمان وسيمون باكاردأنهم يرجعونا لفترة الطفولة الجميلة، بعيدًا عن أساليب الإبهار فى العرض والصناعة، واللى تعودنا عليها من الإنتاجات الهوليوودية عالية التكلفة والتقنية.

الفيلم بـ يحكي عن المغامرات المدهشة للنحلة Bee اللى مش بـ تطيق تقعد فى مكان واحد، وحركتها الدائمة وفضولها ورغبتها فى استكشاف كل شىء حولها بـ يدخلها فى مشاكل كثير ومعقدة، لكنها بـ تواجهها دائمًا بحس الدعابة الشهير عندها وبقدرتها الدائمة على الابتسام… ياسلام! منتهى البساطة فيما يتعلق بالقصة، لكن البساطة اللى ممكن توصم الفيلم بالاستسهال هى فى واقع الأمر صعبة، لأن صناعة فيلم بـ يخاطب أطفال اليوم من خلال قصة بسيطة فى رأينا الشخصى مهمة غير سهلة على الإطلاق فى زمن تعود الأطفال فيه على اللعب بالتابلت والدخول على الإنترنت من الموبايل، صعب جدًا نعرض لهم فيلم عن مغامرات نحلة ويكون مقنع بالنسبة لهم فى زمن Big Hero6، وده التحدي اللى –فى رأينا- نجح المخرج فى تقديمه.

الموسيقى التصويرية كانت جميلة ولذيذة، حماسية وتدخل القلب من أول مشهد، وقد يرجع السر لها فى تذكرنا لأيام طفولتنا لأنها كانت أقرب ما يكون بتترات البرامج والمسابقات اللى كنا بـ نشوفها مع جيل الثمانينات والتسعينات فى المحطات الأرضية.

على الرغم من اللعب على وتر الذكريات، إلا أن فى اعتقادنا الفيلم موجه بالأساس للصغار مش للكبار، بمعنىأنكم لو كان معاكم أولادكم ودخلتم معاهم الفيلم ممكن تحسوا ببعض الملل خصوصًا فى الربع الأخير من الفيلم، أما الأطفال فـ نعتقد أنهم هـ يكونوا فى حالة متعة دائمة، ومختلفة عن الأفلام ضخمة الإنتاج.

فيلم Maya the Bee مش أفضل أنيميشن شوفناه فى حياتنا، لكن البساطة والتغيير من أسباب نجاحه رغم ضعف توزيعه داخل سينمات مصر، لكن ممكن يكون تغيير عن نوعية الأنيميشن اللى أصبحنا حافظينها.