The Definitive Guide to Living in the Capital , Cairo , Egypt

Morgan

Morgan: فيلم رعب على خيال علمي

  • أنيا تايلور جويروز ليزلي...
  • خيال علميدراما
  • لوك سكوت
  • في1 Cinema
written by
Mohamed Hamdy
قيم
قيم الآن
Morgan: فيلم رعب على خيال علمي

بنحب فكرة امتزاج عنصرين لصنع عنصر ثالث… في فيلم اليوم بيجتمع عنصر الخيال العلمي مع عنصر الرعب علشان يقدموا لنا ساعة ونصف تقريبًا من الخيال والمتعة والرعب… لكن الحقيقة النتيجة النهائية ماكانتش في قوة وجمال اللي كنا معتقدينه في البداية. لكن يظل الفيلم صالح للمشاهدة مع مشروب ساخن في الويك إند.

فيلم Morgan من إخراج لوك سكوت، وبطولة كيت مارا، أنيا تيلور جوي، وروز ليزلي، بنشوف قصة عن (كيان) بيقع في المنطقة الفاصلة بين الإنسان والروبوت… الشخص ده تم تصنيعه من خلال طفرة في الحمض النووي.. الأمور كلها بتبدو مبشرة بالخير في البداية… بداية من سرعة النمو وسرعة التعلم والذاكرة وكل شيء تاني، وبيبدو أن العلم توصل لكشف عبقري وحقيقي… لكن الأمور بتنقلب رأسًا على عقب لما مورجان -وده اسم الشخصية- بتشعر بالغضب وبتفلت أعصابها وبتبدأ في إرتكاب جرائم.. هنا بيتم استدعاء أحد الخبراء للحكم على التجربة ومعرفة هل ينفع تستمر أم لا.

الربع الأول من الفيلم بينتصر لجانب الخيال العلمي في الأحداث، وبنشوف معلومات أكثر عن طرق تخليق الأجنة والتلاعب بالأحماض النووية وغيرها من المصطلحات اللي ممكن  تكون معقدة أو مش مجال إهتمام المشاهدين المهتمين بالرعب وبس، لكن باقي أحداث الفيلم بتنتصر تمامًا للنوعية دي من المشاهدين وبتقدم لهم جرعة الرعب المطلوبة، لكن ما نقدرش ننكر أن شوية ملل تسربوا لنفسنا في بداية أحداث الفيلم.

الأداء التمثيلي للأبطال كان متميز ونخص بالذكر طبعًا أنيا تيلور وكيت مارا، اللي قدروا يوصلوا من خلال ملامح وجههم الجامدة كتير جدًا من أحداث الفيلم، وقدروا ينقلوا تركيزنا لطريقة كل منهم في الحركة والكلام والتفاعل، ودي أهم حاجة بنقيم علي أساسها نجاح الفنان من عدمه.

على الرغم من وجود بعض المشاكل في السيناريو لكن مانقدرش نقول إن سيناريو الأحداث كان فاشل بالكامل، فقط كان محتاج بعض الحركة خاصة في الجزء الأول من الفيلم على الرغم من قوة المشهد الإفتتاحي للأحداث. أما الحوار فكان ممل في جانب كبير منه وحسينا إن وجود الحوار ماخدمش القصة إطلاقًا بل على العكس أضعف الأحداث على الشاشة فى بعض المشاهد.. لكن مانقدرش ننكر بعض المشاهد اللى كان فيها تميز حواري لكنها كانت قليلة.

الديكورات والموسيقى التصويرية كانوا من أهم عوامل قوة الفيلم، والديكورات قدرت تخلق عالم كامل للمنطقة اللي بتدور فيها أحداث الفيلم واللي المفروض إنها منطقة سرية ومافيش حد يعرف عنها حاجة، كمان الموسيقى ساعدت على خلق جو من الترقب في الأحداث وقدرت تنقلنا سمعيًا لمساحة أحداث الفيلم وتكاملت مع الديكورات علشان تقدم لنا قصة متميزة بتجمع بين الخيال العلمي والرعب زي ما قولنا قبل كده.

فيلم Morgan مانقدرش نقول عليه فيلم خيال علمي بس، ولا فيلم رعب وخلاص!.. لكنه مزيج من الإتنين يستحق المشاهدة وهيعجب مساحة عريضة من الجمهور بشرط أننا ما نحطش له توقعات كتيرة أو نتخيل أنه أجمد فيلم.

عجبك ؟ جرب

The Blair Witch Project

نصيحة 360

الفيلم يعتبر التجربة الإخراجية الأولى للمخرج لوك سكوت

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح