The Definitive Guide to Living in the Capital , Cairo , Egypt

فيلم Nightcrawler بـ يعرض الصورة القاتمة لبيزنس القنوات الفضائية ومحطات التليفزيون الأمريكية اللى ممكن تعمل أى شىء وتدفع أى مبلغ مقابل الحصول على قصة مثيرة، قصة تزود عدد المشاهدين، حتى لو على حساب أخلاقيات المهنة، أو حتى على حساب أخلاق العاملين فى المجال! ومع استمرار عرض أحداث الفيلم، بـ يتولد عندنا الشعور أن اللى بـ يحصل فى أمريكا مش مختلف كثير عن اللى بـ يحصل فى مصر!

الفيلم بـ يبدأ بمشاهد افتتاحية للبطل جيك جيلنهال، شاب مغمور بـ يكسب بعض القروش من سرقة البوابات المعدنية المصنوعة من النحاس، وبـ يبيعها لتجار الخردة بالكيلو، بـ نشوفه وهو بـ يحاول يتفاوض على سعر كيلو النحاس بأسعار بخسة، ثم وهو بـ يضطر يضرب ضابط شرطة تعرض له أثناء قيامه بالسرقة، وبـ نعرف أن طموح جيك أعلى بكثير من أنه يكون لص معادن.

بالمصادفة بـ يشوف وهو راجع من شغله حادث على الطريق، وبـ يلمح أحد الشباب وهو بـ يصور محاولة الشرطة إنقاذ فتاة من بين سيارة مشتعلة، وبـ يعرف منه أنه بـ يصور شرائط الحوادث ويبيعها للقنوات الفضائية اللى بـ تعرضها فى مستهل النشرات الإخبارية، بـ تبدأ الفكرة تلمع فى دماغ جيك، وبـ ينفذها فورًا.

جيك بـ يرهن الدراجة الخاصة به مقابل كاميرا فيديو غير محترفة وجهاز بـ يرصد مكالمات اللاسلكي الخاصة بالشرطة، جيك بـ يقضى الليل فى التقاط إشارة الحوادث والتوجه لأماكن الحوادث وتصويرها وبيعها للقنوات الفضائية، لكن اللى بـ يحصل بعد كده أن…. الحقيقة إحنا مش عاوزين نحرق عليكم الأحداث المشوقة أكثر من كده.

الأداء التمثيلى للبطل جيك جيلنهال في دور لويس بلوم، كان أداء أكثر من رائع، تمثيل هادئ ومشاهد محترفة ونظرات عينيه كانت بـ تعكس دائمًا حجم المعاناة اللى بـ يعانيها، على الرغم من شخصيته الانتهازية ونفسه المتعطشة لجمع المال بأي شكل مهما كان مصدره.

زوايا التصوير والإضاءة كانت متميزة جدًا، واختيار الليل لتصوير معظم مشاهد الفيلم كان من الأمور الناجحة، على الرغم من إصابتنا ببعض الاكتئاب نتيجة قلة مشاهد التصوير الصباحي، وحسينا ببعض الملل فى منتصف الفيلم مع تكرار بعض الأحداث بعينها، لكن بشكل عام الفيلم يعتبر بـ يسلط الضوء على عالم أخبار الحوادث فى الولايات المتحدة وإزاى ممكن الطموح يوصل بإنسان لمرحلة نسيان –أو تناسى– أخلاقه الشخصية.

بـ ننصحكم بمشاهدة الفيلم فى الـ Weekend، لكن حطوا فى اعتباركم أنه فيلم درامي مع خيط من الأكشن، يعنى ما تتوقعوش مشاهد كوميدية أو رومانسية على الإطلاق، وبالتأكيد لازم تشوفوا الفيلم لو كنتم بـ تشتغلوا فى الوسط الإعلامي أو الصحفي بشكل عام.