The Definitive Guide to Living in the Capital , Cairo , Egypt

الحقيقة أننا نادرًا ما بـ نشوف أفلام بـ تقع أحداثها على بوارج حربية أو غواصات أو قطع حربية بشكل أوسع، الغريب أن الأفلام اللى بـ تتناول الموضوع ده بـ تحقق نجاح كبير، ورغم كده مش بـ نشوف إنتاج واسع لقصص بـ تدور أحداثها على القطع الحربية.

بعد نهاية الحرب العالمية الثانية اكتشف العالم أن المواجهات المسلحة مش الحل الأمثل لحسم المعارك، أكثر من 60 مليون إنسان فقدوا حياتهم خلال الحرب الدامية اللى أكلت العالم من أقصاه إلى أدناه، ومع نهاية الحرب بدأت حرب جديدة بين الولايات المتحدة والاتحاد السوفيتى بسلاح جديد بـ يعتمد فى الغالب على صراع أجهزة المخابرات وسباق التسليح النووى بين الكتل الدولية الضخمة.

على خلفية كل ده اختار المخرج تود روبينسون أنه يبدأ أحداث فيلمه “الشبح” عن الكابتن ديمي (أد هاريس) قائد غواصة سوفيتية بـ يلاقى نفسه فى صراع داخلى داخل الغواصة للسيطرة على مجموعة من الخونة، وكيفية تصرفه أمام الموقف الصعب اللى بـ يجد نفسه فجأه فيه.

رغم الثراء التاريخي لمرحلة الحرب الباردة، إلا أن الفيلم فشل أنه يحافظ على نفس درجة الحرارة اللى كانت بـ تدور فيها الأحداث فى الوقت ده على ساحة الصراع العالمى، وعلى الرغم من كم الأحداث اللى كان ممكن يستعملها المخرج فى تطعيم الفيلم، إلا أننا كنا طوال الوقت حاسين أن رتم الفيلم أبطأ مما يجب أن يكون، وكنا طوال الوقت متوقعين الأحداث القادمة كأن السيناريو مفتوح أمامنا، وده من نقاط الضعف اللى لاحظناها فى الفيلم.

أد هاريس فنان اشتهر بأداء أدوار الشر أو الأدوار الروسية بشكل عام، شوفناه قبل كده فى دور القناص الروسى فى Enemy at the gates وما حدش يقدر ينسى دوره الرائع (الجنرال هامل) فى فيلم The rock وغيرها من الأدوار المتميزة، وواضح أنه فى (الشبح) بـ يكمل مسيرة الأدوار المتميزة المشتهر بها، وده من الأسباب الأساسية اللى خلتنا نعطى الفيلم 3 نجوم.

الموسيقى التصويرية كانت سيئة، كانت هادئة و”نايمة” زيادة عن اللزوم فى فيلم المفروض أنه أكشن من نوع خاص، وده كان من العوامل اللى أعطتنا إحساس عام أن الرتم العام للفيلم أقل من اللي كنا متوقعينه.

Phantom هـ يكون فيلم ممتاز بالنسبة لك لو نفسك طويل وبـ تحب تتفرج على الأفلام بهدوء ومش بـ تزهق بسرعة، أما لو كنت من الناس اللى عاوزين يشوفوا الأحداث بـ تتغير وتتطور بسرعة واستمرار ننصحك تشوف فيلم ثاني.