The Definitive Guide to Living in the Capital , Cairo , Egypt

مشاهدة فيلم Point Break عبارة عن تجميع لعدد ضخم من مشاهد المخاطرات والقفز من أماكن عالية وتسلق الجبال والغوص فى البحار، مع خيط درامي خفيف بـ يربط كل الأحداث دي ببعضها مع استعراض عالى لإمكانيات التصوير بتقنيات الـ 3D، هو ده الفيلم باختصار، نتكلم بالتفصيل بقى!

من إخراج أريكسون كور وبطولة لوكا بريسي وراي وينستون وتيريزا بالمر وإدجار راميريز بـ نشوف قصة ضابط فى مكتب التحقيقات الفيدرالي بـ يحاول يتتبع مجموعة من المجرمين غير التقليديين، واللى بـ يلجأوا فى عمليات السرقة بتاعتهم لحركات خطرة بـ تتضمن القفز من ارتفاعات عالية أو حتى القفز من غير مظلة من طائرة!

الضابط واللى له ماضي فى الحركات الخطرة بـ يحاول ينخرط مع العصابة فى سبيل كشف أساليب عملهم وانتهاز الفرصة المثالية، لكن الأحداث بـ تتطور بعد كده بشكل ما كانش فى حسبان أي بطل من أبطال الفيلم، لكن بالنسبة لنا على الأقل الأحداث كانت متوقعة ومفهومة.

اللى ما كانش مفهوم بالنسبة لنا هو التطويل الشديد اللى تعرض له النصف الثاني من الفيلم، وخصوصًا المشاهد النهائية اللى حسينا أن المخرج كان متردد يقفل الفيلم فى أي نهاية بالضبط! حتى أن باقي المشاهدين استعدوا أكثر من مرة لمغادرة القاعة، وفى كل مرة يكتشفوا أن الفيلم لسه مكمل معانا! وده للأسف أصابنا ببعض الملل.

الموسيقى التصويرية كانت أكثر من رائعة، حماسية ومتناسقة مع الأحداث وقدرت تعيشنا فى جو من الإثارة مع تغيرات الأحداث، وطبعًا ساعدها على ده السيناريو المتجدد دائمًا واللى مش بـ يسيبنا للملل ولو للحظة واحدة من خلال الانتقال للعديد من مشاهد المخاطرات، ويمكن العيب الوحيد للسيناريو كان الإغراق فى المشاهد الخطرة على حساب دراما الفيلم نفسها.

صورة الفيلم كانت متميزة وجميلة جدًا، كادرات واسعة ومناظر طبيعية مبهرة ومتنوعة ما بين الجبال والبحار والغابات، لكن للأسف التركيز ما كانش على المشاهد دي بقدر ما كان على المشاهد الخطرة اللى بـ يتم تنفيذها فى الأماكن دي.

آخر حاجة نقدر نقولها بخصوص Point Break هى أننا مش بـ نرجح مشاهدته للمشاهدين اللى بـ يخافوا من المشاهد الخطرة أو المرتفعات لأن الفيلم بـ يلعب على التيمة دي طوال الوقت تقريبًا.. إحنا حذرناكم!