The Definitive Guide to Living in the Capital , Cairo , Egypt

أفلام
Poltergeist

Poltergeist: تيمة مكررة ورعب ممل

  • روزماري ديويتساكسون شربينو...
  • رعب
  • جيل كنانجيل كنان
  • في1 Cinema
تم التقييم بواسطة
Mohamed Hamdy
قيم
قيم الآن
Poltergeist: تيمة مكررة ورعب ممل

الترجمة الحرفية لكلمة Poltergeist تعني "الأرواح الشريرة"، لكن بـ يتم الرمز بها للأشباح اللى بـ تعمل صخب وضجيج في المكان اللى بـ تبقى موجودة فيه، كنوع من أنواع إثبات الوجود وبث الرعب في نفوس البشر الموجودين في نفس مكان تواجدها، ودي الفكرة الأساسية اللى اعتمد عليها الفيلم.

اقتباسًا عن فيلم بـ يحمل نفس الاسم وسبق تقديمه في 1982 وحقق نجاح كبير، المخرج جيل كينان كان متوقع أن بإعادة إصدار الفيلم من جديد وتقديمه ممكن يحقق نفس النجاح، لكن الحقيقة في رأينا أن الفيلم ما حققش نصف أو حتى ربع النجاح اللى حققته النسخة السابقة.

من بطولة سام روكويل وروزماري دويت وساكسون شاربينو بـ نشوف قصة أسرة بـ تنتقل حديثًا لمنزل جديد، لكن أطفالهم بـ يبدأوا في معاصرة أحداث صعبة من خلال سيطرة مجموعة من "الأشباح الصاخبة" على المنزل، الأمر اللى بـ يجعل العائلة تلجأ لمجموعة من المتخصصين في علوم ما وراء الطبيعة.

السؤال اللى بـ يطرح نفسه: هل على الرغم من تدني المستوى الفني للفيلم، وتكرار القصة واقتباسها من عدة تيمات لأفلام رعب سابقة، هل الفيلم هـ يفشل في مصر؟ في اعتقادنا أن الإجابة هي لأ، والدليل هو تخصيص أكثر من قاعة له لما روحنا نشوف الفيلم في سينما سيتي ستارز، والعدد الضخم من الشباب المراهق اللى كان بـ يتسابق للحصول على تذكرة خصوصًا أن عرض الفيلم في مصر تزامن مع موسم الأجازات.

عرض الفيلم بتقنية ثلاثية الأبعاد 3D كان من أكثر الأشياء اللى حرقت دمنا بخصوص الفيلم، لأن المخرج ما استغلش التقنيات الكبيرة اللى بـ تعطيها له الـ 3D لتوليد أي أسلوب رعب جديد أو مختلف وحسينا أن العرض الثلاثي الأبعاد كان كل الغرض منه زيادة سعر التذكرة مش أكثر، لكن الشباب اللى كان قاعد معانا في السينما كانوا فرحانين جدًا وحاسين برعب حقيقي.. رعب ما حسيناش به إحنا أو أى مشاهد قديم للسينما بأي جزء منه. وشعرنا بالشفقة على جيل كامل مش هـ يعرف عن الرعب أكثر من مجرد مشاهد الـ
"خضة" والمباغتة للجهاز العصبي!

الموسيقى التصويرية للفيلم كانت ضعيفة زيها زي الديكورات والأحداث والإخراج والتمثيل، وباقي عناصر الفيلم، وعلشان ما نكونش ظالمين نقدر نقول أن الناس اللى بـ تحب المشاهد المفاجئة وأسلوب "الخض" في الرعب ممكن يلاقوا الفيلم كويس، لكن لو كنتم زينا من محبى الرعب المطبوخ على نار هادئة.. الفيلم هـ يكون ممل ومستهلك ومكرر بالنسبة لكم.

Poltergeist تجربة سينمائية سيئة مش بـ نرشحها لأي حد بـ يفهم فيما يتعلق بأفلام الرعب، أو حتى الأفلام العادية، انتظروا عرضه في القنوات الفضائية وخلاص!

عجبك ؟ جرب

The Atticus Institute.

نصيحة 360

ده أول فيلم يخرجه جيل كينان منذ عام 2008.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح