The Definitive Guide to Living in the Capital , Cairo , Egypt

Room

Room: فيلم مُبالغ فيه!

  • بري لارسونجاكوب ترمبلاي...
  • دراما
  • ليني أبرامسونليني أبرامسون
  • في1 Cinema
تم التقييم بواسطة
Mohamed Hamdy
قيم
قيم الآن
Room: فيلم مُبالغ فيه!

الحقيقة أن عرض فيلم Room في مصر اتأخر جدًا، وكان المفروض يتم عرضه بالتزامن مع حفل توزيع جوائز الأوسكار، لأن الفيلم كان من ضمن الأفلام المرشحة للجوائز، لكن السؤال اللى بيطرح نفسه: هل الفيلم يستحق كل الاحتفاء اللي شوفناه بخصوصه؟

الإجابة المباشرة هي لأ.. على الرغم من قوة الفيلم وتأثيره، إلا أن حالة الاحتفاء المبالغ فيها، والنظر للفيلم كواحد من أفضل الأفلام في الأوسكار، كل ده كان في رأينا نوع من المبالغة غير المقبولة، حتى الفيلم لما فاز بالأوسكار فاز في فئة أفضل تمثيل، يعني الفيلم نفسه –رغم قوته- ما يستحقش كل ده.

الفيلم من تأليف إيما دونوغو وإخراج ليني أبراهامسون، وبيحكي قصة الأم بري لارسون اللي بتعيش مع إبنها الوحيد جاك واللي قام بدوره جاكوب ترمبلي في غرفة مغلقة عليهم، بعد اختطاف الأم من قبل مجرم مجنون احتجزها لفترة طويلة جدًا، وأنجب منها الطفل الصغير ده.

الفيلم بيبدأ بمشاهد افتتاحية للحياة اليومية للأم وطفلها في الغرفة، ومن هنا بنشوف استغلال متميز ورائع للديكورات والمساحة الضيقة اللي بيعيش فيها الثنائي، وبنبدأ نشوف محاولات وخطط الأم للهرب من الغرفة، واللي بتنجح فيها أخيرًا وبتقدر تسرب إبنها خارج الغرفة، ومن هنا بتتفجر الأحداث وبيتم تحرير الأم أيضًا.

الفيلم بياخدنا بعد كده في جولة في حياة البنت العائدة من الموت واللي ظن أهلها أنه مصيرها النهائي، وبنكتشف مع البطلة أن السجن الحقيقي مش بس في الغرفة.. السجن الحقيقي ممكن يكون في قلوب وعقول وطريقة تفكير المحيطين بينا، لكن نعيب على الفيلم بطء الرتم وعدم وجود أحداث جذابة فيه.

صناع الفيلم استغلوا حالة الأسئلة عندنا في النصف الأول من الفيلم علشان يقدموا لنا حالة من التشويق كانت بتقل مع الوقت مع استمرار الكشف عن الإجابات وطرح أسئله أخرى، لكن حالة من الملل أصابتنا خاصة مع النصف الثاني من الأحداث مع تركيز صناع الفيلم على الجزء النفسي أكتر من الجزء المعتمد على الأحداث والاثارة نفسها.

لو بنتكلم عن أفضل ما في الفيلم هيكون الأداء التمثيلي الرائع لـ جاكوب ترمبلي واللي قدم أداء متميز أكبر بكتير من عمره، وبنتوقع له مستقبل مبهر بعد كده وهننتظر خطواته السينمائية القادمة.

كلامنا عن Room واللي ممكن يكون قليل لقلة أحداث الفيلم خلص.. لكن يهمنا رأيكم بعد ما تتفرجوا على الفيلم.

لو عاوزين تشوفوا الفيلم نزل في سينمات إيه شوفوا مواعيد السينما على موقعنا.

عجبك ؟ جرب

 10 Cloverfield Lane

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح