The Definitive Guide to Living in the Capital , Cairo , Egypt

للأسف توقعاتنا عن الفيلم كانت أقوى بكثير من اللى شوفناه في النهاية على الشاشة، لا الإبهار كان زي اللى توقعناه، ولا القصة زي اللى توقعناها، وطبعًا الأداء التمثيلي للأبطال كان أقل بكثير من اللى توقعناه.. San Andreas فيلم مخيب للآمال بشكل كبير، حاول يقدم كل شىء، وفشل في النهاية في تقديم أي شىء بشكل صحيح!

براد بيتون المخرج بـ يحكي في أحدث أفلامه عن خط من التشوه الجغرافي عبر ولاية كاليفورنيا الأمريكية، علماء الزلازل توقعوا زلزال قوي يقوم في المنطقة دي، الفيلم اللى بـ يقوم ببطولته دواين جونسون وكارلا جوجينو وألكسندرا داداري بـ يحكي عن زلزال -تخيلي- عنيف ومدمر بـ يضرب المنطقة، وبـ يحاول دواين إنقاذ عائلته من الدمار اللى بـ يلف المدينة بالكامل، سواء كانت مخاوفنا من غضب الأشخاص أو تحولات الفيروسات والبكتيريا، بـ يظل غضب الطبيعة من الأمور المستحيل التنبوء بها أو حتى التصدي لها.

كلنا جربنا غضب الطبيعة في زلازل لعل أهمها زلزال أكتوبر اللى ضرب مصر في التسعينيات، وكلنا تابعنا غضب الطبيعة المتمثلة في فيضان التسونامي الناتج عن زلزال ضرب البحر هو كمان، الزلازل واحدة من أسوأ أشكال غضب الطبيعة، ومن أكثرها فتكًا واللى بـ يقف أمامها الإنسان عاجز عن التصرف بأي حال من الأحوال، هل قدر الفيلم يعكس الصورة دي؟!

على الرغم من ضعف مستواه إلا أن الفيلم قدر يعكس غضب الزلازل بشكل قوي ومؤثر، بداية من مشاهد انفجار أحد السدود العملاقة تحت تأثير الزلزال ونهاية بمشاهد انهيار المباني الشاهقة وناطحات السحاب، لكن بمجرد انتهاء انبهارنا بمشاهد الانهيارات، انهارنا شخصيًا من ضعف المستوى التمثيلي لكل المشاركين في الفيلم تقريبًا ويمكن دواين جونسون على رأس الجميع فيما يتعلق بضعف التمثيل، على الرغم من تخديم السيناريو على إظهاره بصورة البطل الوحيد طوال الوقت.  

على النقيض من الإبهار كانت الموسيقى التصويرية الضعيفة وغير المتناسبة مع تسلسل الأحداث، واللى ما تركتش داخلنا أي ذكرى أو إحساس بها بعد نهاية الفيلم، أما الديكورات فكانت متميزة والمزج بين مشاهد جونسون في قيادة الطائرة ومشاهد الطائرة نفسها جاء بشكل احترافي وغير مشكوك فيه لدى المشاهدين.

آخر نصائحنا لكم: انتظروا San Andreas في الفضائيات وما تضيعوش وقتكم وفلوسكم في دخوله في السينما، لأنكم مش هـ تأخذوا أكثر من شوية إبهار والسلام.