The Definitive Guide to Living in the Capital , Cairo , Egypt

Southpaw: حب المصارعة… وحب الحياة

Southpaw: حب المصارعة… وحب الحياة

مين قال أننا ممكن نزهق من الأفلام الرياضية؟ وخاصة الأفلام اللى بـ تتكلم عن الرياضات العنيفة زي الملاكمة أو المصارعة؟! الحقيقة أننا بداية من أفلامStreet Fighter  وباقي إبداعات جان كلود فان دام وسلفستر ستالون الخاصة بالأفلام اللى بـ تتكلم عن الإنجازات الرياضية وإحنا بـ نحب نتابع ونتفرج على النوعية دي من الأفلام، طبعًا لو استثنينا المساهمات العربية العظيمة في المجال ده زي "قبضة الهلالي" أو "حلم العمر" وغيرها من الأفلام اللى -أكيد- مش حابين نتكلم عنها!

من إخراج أنطوان فوكوا وبطولة جيك جيلنهال وناعومي هاريس بـ نشوف قصة ملاكم متميز ومتفوق اسمه "بيلي هوب" متزوج من واحدة جميلة "أنجيلا"، وبـ يفوز بكل البطولات اللى بـ يدخلها، لكن مع استمرار الأحداث بـ نشوف إزاي حياته بـ تتحول180  درجة بعد ظهور ملاكم محترف في حياته بـ يتحداه بكل طريقة ممكنة من خلال استفزازه وشتيمته في أحد المؤتمرات العامة، الأمر اللى بـ ينتج عنه وفاة زوجته بعيار ناري مجهول.

بيلي بـ يحمل مسئولية موت زوجته للملاكم اللى حول حياته لجحيم، ومع الوقت بـ يبدأ يهمل نفسه ويعاقبها على وفاة زوجته، وبـ ينزل لقمة الحضيض في حياته الرياضية والشخصية.. هل ممكن بعد ما ينزل للمستوى ده أنه يرجع يصعد ثاني؟ وهل يقدر يواجه الملاكم اللى خسر أمامه كل حاجة فيما مضى من جديد؟ هي دي قصة الفيلم وحبكته الرئيسية.

جيك جيلنهال بـ يثبت يوم بعد يوم أنه ممثل عبقري وقادر على أنه يتقمص أي شخصية توكل إليه، لسه كنا شايفينه في فيلم عبقري ثاني هو Nightcrawler وكان بـ يقوم بدور رجل بـ يدور على الحوادث البشعة علشان يصورها ويبعتها للقنوات الفضائية علشان تعرضها في الأخبار المسائية.. الدور استلزم أنه يخسر كثير من وزنه ويظهر بمظهر رجل غير مهندم وبـ يصحى طوال الليل وينام طوال النهار، وأداؤه كان مذهل في Southpaw بـ نشوفه في دور ملاكم قوي وجسمه مرسوم بشكل كويس ثم بـ يحصل له انكسار بـ يؤدي به للضعف والعودة من جديد للمربع صفر.

الموسيقى التصويرية لعبت دور مهم في الأحداث، صحيح هي مش موسيقى قوية زي سلسلة Rocky لكنها برضه كانت مؤثرة ولها دخل كبير في استمتاعنا بالأحداث، الديكورات كمان كان لها دخل كبير وخاصة ديكورات الصالة الرياضية اللى بـ يتدرب فيها بيلي واللى عكست الدفء والاحتواء على الرغم من الفقر ونقص الإمكانيات، على العكس من ديكورات منزل بيلي في فترة غناه واللى كانت -على الرغم من الفخامة والغنى- بـ تعكس إحساس بالبرودة وعدم الأمان.

الأكشن والصراعات في الفيلم تركزت بالمقام الأول على الصراع داخل حلبة الملاكمة، ونقدر نقول أن الجولات كانت قوية ومؤثرة ومتقنة الإخراج، مع بعض الدم وكثير من اللكمات، لكنها طوال الوقت كانت بـ تفكرنا بمشاهد الصراع فيRocky  وسلسلة الأفلام اللى تناولت قصته.

باختصار.. لو كنت من محبي أفلام الأكشن الرياضي.. هـ يعجبك جدًا Southpaw مع بعض الشعور بالتكرار مع Rocky وأفلام الرياضات العنيفة بشكل عام.

عجبك ؟ جرب

سلسلة أفلام Rocky.

نصيحة 360

الفيلم يعتبر آخر فيلم وضع موسيقاه جيمس هورنر قبل وفاته في حادثة طيران في عام 2015.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح