The Definitive Guide to Living in the Capital , Cairo , Egypt

Spectre

Spectre: جيمس بوند يضرب السينمات

  • دانييل كرايجكريستوف والتز...
  • إثارةدراما...
  • سام منديزسام منديز
  • في1 Cinema
تم التقييم بواسطة
Mohamed Hamdy
قيم
قيم الآن
Spectre: جيمس بوند يضرب السينمات

العالم ممكن تحصل فيه تطورات كبيرة وكثيرة.. لكن جيمس بوند لا يمكن يتغير أبدًا! هـ يفضل بقوته وقدراته الأسطورية والمخترعات الحديثة اللى بـ تظهر فى أفلامه والعربيات اللى بـ تطير في الجو، والبنات اللى بـ تترمي في حضنه أول ما تشوفه.. كل الأمور دي هـ تفضل زي ما هي دون تغيير.. ويمكن ده العنصر اللى بـ يجذب المشاهدين حتى اليوم.

المخرج سام ميندز هو مخرج الجزء السابق من السلسلة بعنوان Skyfall وكان في رأينا واحد من أفضل ما تم تقديمه عن جيمس بوند في تاريخ السلسلة، وفي الجزء الجديد اللى شوفناه مؤخرًا بـ يستكمل ميندز القصة من حيث انتهيت في Skyfall، بالتالي إحنا بـ ننصح بشدة أي حد عاوز يدخل Spectre أنه يشوف Skyfall الأول علشان يفهم 100% الأحداث.

الفيلم بـ يبدأ بمشاهد افتتاحية معروفة لكل محبي جيمس بوند.. مطاردة في مدينة مكسيكو في يوم احتفال شعبي بـ يعرف باسم "يوم الموتى".. المشهد بـ يبدأ كالعادة بمطاردة على الأقدام وبـ ينتهي بمطاردة في الجو وسط كثير من الطلقات المضروبة والمباني المهدومة.. بعد المشهد اللى بـ يخطف الأنفاس بـ تبدأ التترات اللى غناها سام سميث بعنوانWriting's On The Wall  واللي تعتبر أسوأ أغنية وأسوأ تتر في سلسلة أفلام جيمس بوند بالكامل!

الفيلم بـ يحكي عن عميل الاستخبارات البريطانية الشهير جيمس بوند (دانيال كريج)، واللى بـ يسعى لتتبع والقضاء على منظمة تجسس أجنبية هي منظمة "الشبح" أو Spectre واللى بـ يحمل الفيلم اسمها وسبق وظهرت في أجزاء سابقة وقديمة من سلسلة أفلام جيمس بوند.

دانيال كريج بـ يقدم أداء تمثيلي معروف منه، ومن الواضح أنه مسك تفاصيل شخصية جيمس بوند كويس وهـ يعرف يعيد تقديمها بشكل متميز، على الرغم من إعلانه أن الفيلم قد يكون آخر مرة له لتقديم الشخصية دي، لكن من ناحية ثانية كريستوفر والتز في أداء شخصية الشرير في الفيلم كان ضعيف جدًا وأضعف من توقعاتنا بشكل ضخم، وحسينا أنه كان ثابت عند أداؤه في Inglourious Bastards كشخصية شريرة، وحاول يقدمه من جديد لكن النتيجة كانت باهتة، خاصة أن زمن ظهوره كان متأخر نسبيًا.

بالنسبة للشخصيات النسائية مع بوند أو Bond Girls زي ما بـ يتم تسميتهم، أداء مونيكا بيلوتشي كان باهت وضعيف على الرغم من اسمها المدوي، وشهرتها الطاغية واهتمام المتابعين بها بعد إعلان مشاركتها في الفيلم، لكن البطولة النسائية الحقيقية كانت من نصيب الفرنسية ليا سيدو، واللي قدرت تقدم دور متميز وتسيطر فيه على انفعالاتها اللى كانت متغيرة ومتقلبة طوال فترة ظهورها على الشاشة.

على العكس من Skyfall المخترعات الحديثة كان لها دور كبير في الفيلم، بداية من السيارات المدهشة اللي لها إمكانيات خارقة واللى بـ يتم صنعها خصيصًا لأفلام بوند، ونهاية بالساعات المتفجرة واللي بـ تعمل أمور عجيبة، وكلها كانت أمور بدأت في الاندثار في أفلام بوند السابقة، لكن تم إعادة تقديمها مع إعادة تقديم شخصية كيو المسئولة عن كل الاختراعات دي.

لو كنت من محبي جيمس بوند وشوفت Skyfall فقط الفيلم هـ تحس أنه إعادة إنتاج للفيلم ده، ولو كنت متابع للسلسلة القديمة قبل إعادة تقديمها هـ تحس أنك بـ تتفرج على مشاهد مقتبسة من باقي أجزاء السلسلة وبـ يتم اعادة تقديمها من جديد.. أما لو كنت ما تعرفش عن جيمس بوند إلا أقل القليل ودخلت الفيلم لمجرد مشاهدة فيلم أكشن.. هـ يعجبك الفيلم جدًا.

عجبك ؟ جرب

Skyfall.

نصيحة 360

الفيلم هو رقم 24 في سلسلة أفلام جيمس بوند.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح