The Definitive Guide to Living in the Capital , Cairo , Egypt

بقى لنا كثير جدًا ما شوفناش أفلام استعراضية بشكل عام، وأفلام استعراضية بالقوة والحماسة دى، بالتالى كان خبر طرح الجزء الأخير من سلسلة Step up مُفرح بالنسبة لنا على أكثر من مستوى، من ناحية إحنا كان عندنا اشتياق للأفلام الاستعراضية، ومن ناحية ثانية بـ نحب دائمًا نشوف المستوى الجديد اللى هـ يروح له صناع المتعة ومصممي الرقصات.

من إخراج تيريش سي وبطولة رايان جوزمان وبريانا إيفجان بـ نشوف جزء جديد ومثير من مسابقات الرقص، كل الفرق اللى شاركت فى كل الأجزاء السابقة للسلسلة بـ تتجمع فى لاس فيجاس لمسابقة أخيرة ونارية، المسابقة اللى هـ يتحدد على أساسها أمور كثيرة جدًا على المستوى الشخصي والعملى للفرق المشاركة.

لكن بعيدًا عن القصة، مين قال أن القصة مهمة فى الأفلام الاستعراضية؟ المخرج عارف، والمؤلف عارف، وحتى المشاهدين عارفين أن أى سياق درامي للأحداث ما هو إلا غطاء خارجي خفيف للدخول لصلب الموضوع الأساسى للفيلم، ألا وهو الاستعراض، والرقصات اللى بـ تستمر من بداية الفيلم لنهايته بلا انقطاع إلا فى مشاهد قليلة.

الرقصات امتازت بالسخونة والقوة، مشاهد الرقصات كانت قوية واحترافية إلى أقصى مدى، وزود قوتها أسلوب التصوير السريع وكادرات الكاميرا الجديدة، والتكوينات البصرية اللى ساعد على تكوينها الديكور المتميز اللى قدر يدخلنا فى جو كل رقصة بالشكل اللى عاوزه المخرج بالضبط.

على الرغم من مستوى الإبهار العالى فى الفيلم وتصميم الرقصات، إلا أن عرض الفيلم بتقنية 3D ما أفادش فى تقديم أى جديد على مستوى الإبهار البصرى، وفى اعتقادنا أن عرض الفيلم بالتقنية ثلاثية الأبعاد كان كل المقصود منه زيادة سعر التذكرة ليس إلا وتحقيق أرباح زيادة.

خلاصة كلامنا، أننا فى الغالب مش بـ نحب الأفلام متعددة الأجزاء، وبـ نحس أن الأجزاء الأولى منها بـ تكون دائمًا الأقوى والأفضل، لكن ممكن نتخطى الموضوع ده فيما يتعلق بالأفلام الاستعراضية، طالما هـ يقدروا يقدموا لنا أعمال متجددة وحيوية على صعيد الإبهار والرقصات.