The Definitive Guide to Living in the Capital , Cairo , Egypt

من أفضل السيناريوهات اللى بـ تعجبنا فى أفلام هوليوود، السيناريو اللى بـ يعتمد على حدث بسيط، أو غلطة تافهة، أو حتى علاقة عابرة، بـ تؤدي فى النهاية لمشكلة كبيرة، ودي كانت الحبكة الأساسية اللى اعتمد عليها فيلم The Boy Next Door اللى أخرجه روب كوهين وألفته باربرا كودي.

كلير بيترسون (جنيفر لوبيز) امرأة مطلقة حديثًا، بـ تتعرف على شاب فى عمر أبنائها "نوح" (ريان جوزمان)، نوح بـ يظهر فى البداية كشخص محترم، وسيم ورياضى، بـ يفهم فى السيارات وبـ يساعد ابن كلير على التكيف مع المجتمع واكتساب شخصية قوية والتقرب من البنات اللى بـ يعتبر من أساسيات سن المراهقة فى المجتمع الأمريكي، من هنا بـ يحصل التقارب المبدئى بين المُدرسة والطالب اللى فى سن أبنائها.

مع تطور الأحداث بـ تحصل علاقة جنسية بين الاثنين، غلطة عابرة بـ تحصل مئات المرات فى كثير من المجتمعات الغربية وخصوصًا المجتمع الأمريكي اللى بـ يعاني من حالة انفلات أخلاقى كبيرة، لكن هل الموضوع بـ يتوقف عند الغلطة دي؟ الحقيقة المشكلة الأساسية فى الفيلم بـ تبدأ من هنا مش بـ تنتهي، ومش عاوزين نتكلم عن تطور الأحداث بعد كده علشان ما نحرقش عليكم الفيلم.

الأداء التمثيلي لجنيفر لوبيز أكثر من رائع، وقدرت تؤدي دور الأم اللى بـ تقع فى صراع بين رغباتها الشخصية وبين دورها كمدرسة وأم، والتزاماتها الأخلاقية والعمرية اللى بـ تفرض عليها أسلوب معين من التعامل والسلوك الشخصى.

الموسيقى التصويرية كانت متميزة لكنها ما قدمتش جديد، بمعنى أنها كانت معبرة عن الجو العام للفيلم لكن مافيش مقطوعة معينة أو جزء معين حسينا أننا عاوزين نسمعه بشكل منفصل بعد نهاية أحداث الفيلم، ودي النقطة اللى بـ نقيم على أساسها الموسيقى التصويرية لأى عمل فني بـ نشوفه.

الديكورات على العكس من الموسيقى، كانت راقية ومتميزة، ومتوافقة مع الأحداث إلى أقصى درجة، خصوصًا ديكورات المشاهد الأخيرة من الفيلم، وديكور المدرسة اللى بـ تشتغل فيها جنيفر، وغيرها من الديكورات اللى كانت متميزة.

The Boy Next Door فيلم إثارة وتشويق متميز، ومنتظرين تعليقاتكم لما تشاهدوا الفيلم بنفسكم.