The Definitive Guide to Living in the Capital , Cairo , Egypt

أفلام
The Conjuring 2

The Conjuring 2 :فيلم رعب بحق وحقيق

  • باتريك ويلسون
  • رعب
  • جيمس وانجيمس وان
  • في1 Cinema
تم التقييم بواسطة
Mohamed Hamdy
قيم
قيم الآن
The Conjuring 2 :فيلم رعب بحق وحقيق

محبي أفلام الرعب مش هينسوا الرعب اللي صاحبهم أثناء مشاهدة الجزء الأول من السلسلة دي.. صناع الفيلم نفسهم مش هينسوا الملايين اللي نزلت عليهم من السماء نتيجة نجاح الجزء الأول، الأمر اللي دفعهم لإنتاج الجزء الثاني، واللي جاء في مجمله أكثر رعبًا وتشويقًا من الجزء الأول، ومع حملة الدعاية المكثفة اللي صاحبت إصدار الفيلم نقدر نقول إننا أمام فيلم رعب قوي ومختلف.

من إخراج جيمس وان، وبطولة فيرا فارميجا، باتريك ويلسون، وفرانسيس أوكونور، بنشوف قصة عائلة بتسكن منزل، ومع مرور الوقت بتبدأ أمور غريبة وشريرة في الحدوث، بداية من العفش اللي بيطير في السماء والصليب اللي بينقلب على السقف، وأمور كتيرة بتجبر الأسرة على استدعاء خبراء في علوم ما وراء الطبيعة.

مع انتقال الخبراء لمعاينة المنزل بيحصل جدل وإختلاف بينهم، ما بين رأي مؤيد لفكرة أن اللي بيحصل ده مس شيطاني حقيقي طال بنت من البنات الموجودة في البيت، والرأي الثاني بيقول أن كل اللي بيحصل ده عبارة عن تمثيل وخداع، ولإننا مش عاوزين نحرق أحداث الفيلم هنسيبكم تعرفوا بنفسكم أي رأي فيهم هو الصح.

المؤثرات الخاصة في الفيلم لعبت دور مهم جدًا، بداية من تحريك الأشياء ومؤثرات الأصوات وحتى الديكورات وخاصة ديكور المنزل المسكون وإنتقال الكاميرا بين الغرف والطوابق، كلها أمور ساعدت على بث الرعب في نفوسنا كمشاهدين، ومع تكنيكات الإضاءة والظهور المفاجئ للأشباح نقدر نقول أن الفيلم يعتبر اختبار حقيقي لمحبي أفلام الرعب ولقدرتهم على التحمل.

الأداء التمثيلي للأبطال كان متميز ومختلف جدًا خاصة ماديسون وولف في دور جانيت واللي قدرت تنقل لنا انفعالات ومشاعر الشخصية اللي بتقدمها بأفضل ما يكون، باقي الأدوار كانت قوية ومؤثرة وحسينا أن كل فنان كان في مكانه بالضبط ومش متخيلين أي شخص تاني ممكن يقوم بالدور غيره.

أهم حاجة لازم تاخدوا بالكم منها هي عدم مغادرة السينما بعد نهاية الفيلم مباشرة، لأنكم هتشوفوا مجموعة مشاهد ومعلومات في غاية الأهمية، مش عاوزين نحرقها عليكم بس في رأينا إن أخر دقائق في الفيلم مع نزول التترات كانت مرعبة أكثر من الفيلم نفسه! ومش هنقول أكتر من كده!

لازم نأكد على أن الفيلم للكبار فقط، وأحترمنا جدًا موقف موظفين الحجز في سينما مول أمريكانا بلازا في 6 أكتوبر لما رفضوا محاولات كتيرة لأطفال صغيرة أقل من السن المسموح له بمشاهدة الفيلم، وده تصرف ماكانش بيحصل في سينمات كتير كانت بتهتم فقط ببيع أكبر كمية من التذاكر لأي فئة عمرية.

سلسلة أفلام  The conjuring واحدة من أقوي سلاسل أفلام الرعب في العالم، وواحدة من السلاسل اللي بيحبها ويتابعها محبي أفلام الرعب وأصحاب القلوب الميتة، لو كنت منهم ننصحك تشوف الفيلم في أقرب سينما ليك فورًا، أما لو كنت بتخاف جدًا من الأفلام دي ننصحك بمشاهدة Finding Dory.. ده فيلم ظريف ولطيف ويناسب أصحاب القلوب المرهفة.

عجبك ؟ جرب

الجزء الأول من نفس السلسلة.

نصيحة 360

في اليوم الأول لتصوير الفيلم تم استدعاء قسيس للصلاة على الفنانين قبل بداية الفيلم كنوع من طرد الشياطين!

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح