The Definitive Guide to Living in the Capital , Cairo , Egypt

صناع سلسلة أفلام The Expendables عارفين كويس هم بـ يقدموا إيه، وعارفين كويس جمهور أفلامهم عاوز إيه.. أنه الأكشن يا سادة.. حيث لا صوت يعلو على صوت الرصاص. ولا قيمة سوى لمشاهد الصراعات المسلحة وغير المسلحة والاشتباك ومطاردات السيارات والطائرات وحتي القوارب والزوارق. الأكشن لازال سلعة رائجة إلى أقصى درجة فى هوليوود بالإضافة للزج بكل أشهر نجوم الأكشن فى التسعينات، ده اللى بـ يشتغل عليه صناع أفلام زي The Expendables .

الجزء الثالث من السلسلة اللى أخرجه باتريك هيوز، وقام ببطولته سيلفستر ستالون، وجيسون ستاثام، وأنطونيو بانديراس، وجيت لي، وميل جيبسون وآخرون بـ يحكي عن فرقة من رجال العمليات الخاصة المتقاعدين، واللى بـ تستعين بهم الحكومة الأمريكية لتنفيذ المهام القذرة اللى مش عاوزة اسمها يرتبط بها بأى حال من الأحوال.

الجزء الأخير من السلسلة بـ يحكي عن مهمة جديدة للفريق لتحرير أحد أصدقائهم، الفيلم بـ يبدأ بمشاهد افتتاحية لمطاردة حامية على ظهر قطار بـ ينتهي بتدميره بالكامل، ثم بـ تأخذنا الأحداث للمهمة الأساسية اللى بـ نشوف فيها عدد كبير من التعقيدات والمطاردات.

زى ما قولنا.. الدراما فى الفيلم والقصة بشكل عام هى مجرد غطاء خفيف لتبرير الأكشن المتصاعد من بداية الفيلم لنهايته بلا توقف، مجرد حيلة بـ يمرر من خلالها صناع الفيلم قدر ضخم من مشاهد الأكشن بكافة أنواعه، وجبة دسمة لعشاق النوعية دي من الأفلام، واللى شوفناهم بكثرة فى دار العرض وخرجوا وهم فى تمام الرضا عن الفيلم.

على الرغم من تقدم معظم أبطال الفيلم فى العمر، إلا أن توظيفهم فى مشاهد الأكشن كان متميز، وساعدهم شوية الفريق الجديد اللى بـ يتم ضمه فى أحداث الفيلم، ويمكن روندا روسى المصارعة اللى ظهر اسمها فى حلقات المصارعة مؤخرًا وأدت أحد الأدوار فى الفيلم كانت وجه نسائى مثير للاهتمام على صعيد الأكشن.

على الرغم من صغر مساحة دور أنطونيو بانديراس، إلا أنه أداه بشكل أكثر من رائع، وساعد على إضفاء جو من السخرية والكوميديا الممتازة على الفيلم بشكل عام، وظهر فى ملامح شخصيته جزء كبير من شخصيته فى فيلم Desperado إنتاج التسعينيات واللى بـ نعتبره من أفضل الأدوار اللى أداها بانديراس فى حياته.The Expendables 3

فيلم مش بـ يهتم بالموسيقى التصويرية أو الديكور، هو فقط فيلم أكشن من أجل الأكشن، الأمر اللى يخلينا نتجاوز عن كثير من سقطات السيناريو والأخطاء غير المنطقية، فى مقابل جرعة من الأكشن تستحق الاحترام لكل عشاق النوع ده من الأفلام، وإحنا على رأسهم.