The Definitive Guide to Living in the Capital , Cairo , Egypt

فى بداية مشاهدتنا توقعنا أن الفيلم اللى بـ يتم عرضه فى مصر قبل أيام من بداية شهر رمضان الكريم أنه يكون فيلم خفيف وظريف، وتجارى إلى حد كبير، لكن الحقيقة كانت أننا أمام عمل درامى رومانسى ثقيل ومحترم ويستحق الاهتمام، وكان ممكن يحصد المزيد من الاهتمام لولا توقيت عرضه فى مصر.

من إخراج جوش يون وبطولة شايلين ودلي، أنسيل يلجورت، لورا ديرن وسام ترامل بـ نشوف قصة إنسانية عاطفية عن قصة حب بـ تجمع شابين اتعرفوا على بعض فى أحد مراكز علاج السرطان فى الولايات المتحدة، الفيلم اللى كان ممكن يكتفى بالتركيز على القصة العاطفية والإنسانية بـ يأخذنا فى أبعاد جديدة ومختلفة للعلاقة، بـ تحمل فى طياتها أحيان كثير من السخرية والضحك، وغيرها من العواطف الإنسانية المختلفة.

أماكن التصوير والديكورات كانت من الأمور المتميزة اللى لاحظناها فى الفيلم، كمان الموسيقى التصويرية لعبت دور مهم فى دخولنا كمشاهدين فى جو الأحداث وانغماسنا مع كل مشهد للنهاية، رغم شعورنا فى بعض المشاهد بالدرامية الزائدة عن الحد، أو رغبة المخرج جوش يون فى أبكائنا كمشاهدين حتى لو كان على حساب الأحداث، لكن بشكل عام نقدر نقول أن الفيلم كان بـ يحاول يكون متوازن بين جرعة الرومانسية والدراما من خلال الأحداث.

على الرغم من تميز التريلر الخاص بالفيلم، إلا أنه فى رأينا مش بـ يعبر عن كامل الحالة الإنسانية فيه، ويستحسن أنكم تشوفوه بنفسكم قبل أى محاولة للحكم على الأحداث من خلال التريلر أو النقد المنتشر عن الفيلم على الإنترنت.

كلامنا عن The Fault in our Stars قد يكون قليل، مع شعورنا أن مافيش كلام كثير نقدر نقوله عن الفيلم، لأن بعض الأفلام بـ يكون مشاهدتها أفضل بكثير من الكلام عنها، لأن المشاهدة بـ تلخص كثير من الأمور اللى ممكن الكلمات ما تقدرش تعبر عنها، لكن بشكل عام مش بـ نرشح الفيلم للمشاهدة من الجمهور اللى ممكن تكون مشاعره متأججة، أو “دمعته قريبة” زى ما بـ نقول فى التعبير العامي.

 The Fault in our Starsفيلم رومانسى درامي عن قصة حب مختلفة وجميلة، ومحتاجة قلب قوى شوية علشان تقدروا تكملوا الأحداث للنهاية بدون دموع.