The Definitive Guide to Living in the Capital , Cairo , Egypt

اختيارنا مشاهدة فيلم باسم “الأرض المتجمدة – The Frozen Ground” فى ظل البرد الشديد اللى بـ تشهده مصر كان قرار جرىء، لكننا نعتقد أن اسم الفيلم كان بـ يحمل فى داخله رسالة أكثر من مجرد الكلام عن أرض جليدية، على الرغم من تغطية الثلوج لكثير من أماكن التصوير.. بل روح الممثلين أنفسهم!

من إخراج سكتو والكر بـ نشوف اثنين من أقرب فنانى هوليوود لقلبنا، رغم ابتعاد نيكولاس كيدج عن ساحة أفلام الأكشن اللى حاول يعمل تاريخ لنفسه فيها، وكمان جون كوزاك اللى بـ يطل علينا بعد غيبة عن الأدوار الكبيرة، بمجرد مشاهدتنا للأسماء حسينا أننا هـ نكون أمام فيلم قوى، لكن هل كان ظننا فى محله؟

الإجابة لأ.. فيه حالة من البرود بـ تغلف أحداث الفيلم وأداء أبطاله، على الرغم من قصة الفيلم اللى بـ تحكى عن سفاح متخصص فى الاعتداء الجنسى على البنات اللى بـ يشتغلوا فى مجال الدعارة ومن ثم بـ يقوم بقتلهم، ومحاولة رجال الأمن الأمريكيين الإيقاع به، وكون الفيلم مستمد من قصة حقيقية، كل الأمور دى كانت بـ تدفع فى اتجاه تقديم فيلم قوى وحماسى، لكن النتيجة كانت سيطرة حالة من البرود على الأحداث بشكل ملحوظ، ناهيك عن التطور البطىء فى خط سير أحداث الفيلم اللى خلانا نشعر بالملل فى كثير من الأحيان.

نيكولاس كيدج بدأ يطور ثانى من أداؤه التمثيلى بعد فترة من عدم قدرته على ضبط أدواته كممثل، الحالة السيئة اللى شوفناه فيها فى أكثر من فيلم يمكن بداية مع فيلم زى Next وحتى اليوم، نقدر نقول أنه بدأ يخرج من الحالة دى بشكل تدريجى، لكن ملامح وجهه لسه بـ تحمل ألم أو ذكرى قديمة، لعل ده اللى دفع القائمين على الفيلم بتصويره بصورة ضابط الشرطة اللى عنده ذكرى مؤلمة فى حياته.

جون كوزاك قدر يقوم بالدور المطلوب منه بأفضل ما يكون، وقدر يوصل لنا إحساس وشكل المجرم اللى بـ يقوم بأعنف الجرائم بينما وجهه بـ يرتسم عليه البراءة الكاملة أثناء التحقيق معه، إحنا بس يمكن نلوم السيناريو اللى كان بطىء وما قدرش يستغل القصة فى تحقيق عنصر التشويق المطلوب.

الديكورات كانت كويسة ووصلت لنا روح الفيلم بشكل مكثف، لكن بعض المشاهد الساخنة أو الإباحية كان مبالغ فيها على الرغم من التدخل الرقابى العنيف، إنما الموسيقى التصويرية ما كانتش بالقوة اللى كنا متوقعينها، وبشكل عام كان ممكن تكون أفضل من كده.

The Frozen Ground فيلم كويس جدًا، لكن بالنظر لأسماء الأبطال المشاركين فيه كان ممكن يكون أفضل.