The Definitive Guide to Living in the Capital , Cairo , Egypt

لازم نعترف أننا مش من محبين سلسلة The Hunger Games، خاصة بعد (مطها) وتطويلها لعدد من الأجزاء، بالذات الجزء الماضي واللي حسينا أنه مجرد جزء تمهيدي للأحداث النهائية اللي شوفناها مع الجزء الحالي.. بالتالي كانت مشاهدتنا للفيلم إحنا وكل القاعة الممتلئة بالجمهور كانت بالأساس لمشاهدة نهاية The Hunger games.. ولازم نعترف أن النهاية كانت فعلًا أسطورية وتستحق المشاهدة.

من إخراج فرانسيس لورانس وبطولة جنيفر لورانس وجوش هيتشيرسون وستانلي توتشي ووودي هاريلسون بـ نشوف نتيجة ثورة (كاتنيس أفردين) على الرئيس (سنو) وعلى النظام الفاشي لـ(الكابيتول) المستمر في ارتكاب المجازر بحق الثوار.

الفيلم بـ يبدأ أحداثه من نفس اللحظة اللي انتهى عندها المرة الأخيرة.. (كاتنيس) مصابة وحبيبها (بيتا) تم التلاعب في جسده وتحويله لشخص محب للكابيتول، وعلى الرغم من تشكيله خطر على الفريق بـ يتم الدفع به من جديد للأحداث كنوع من الدعاية الإيجابية للثوار وبيان أنهم لسه قادرين على الصمود والتحدي.

المرة دي (كاتنيس) مش بـ تظهر كمجرد رمز للثورة على الكابيتول ورجاله، لكنها بـ تحمل سلاحها وبـ تبدأ في مواجهة الرئيس (سنو) في أخر دورة ألعاب.. الدورة اللي بـ تتم في المنطقة المحيطة بالمقر الرئيسي للكابيتول، في محاولة أخيرة من (سنو) للسيطرة على الأوضاع قبل حدوث الثورة.

الأداء التمثيلي لكل فريق العمل كان متميز، ومن الواضح أنه مع استمرار عرض السلسلة أصبح كل بطل عارف بالظبط إيه المطلوب منه وإيه بالظبط أبعاد الشخصية اللي بـ يقوم بأداءها وده أدى لأرتفاع المستوى التمثيلي لكل الأبطال.

نقدر نقول أن أحداث الحركة في الفيلم بدأت مع بداية النصف الثاني للأحداث وهي بداية متأخرة إلى حد ما، لكن المرة دي الأكشن في الفيلم بـ يكتسب في كثير من الأوقات صورة من صور الرعب، خاصة مع إطلاق الرئيس سنو للكائنات المتحولة جينيًا واللي مثلت مع العرض بتقنية ثلاثية الأبعاد بعض المشاهد الخاطفة والمرعبة للمشاهدين، ويمكن دي المرة الأولى اللى يتم دمج Segment مرعب مع أحداث السلسلة وهو كان أمر متميز الصراحة.

الموسيقى التصويرية تراجعت في مستواها على حساب تقنيات العرض والجرافيك والديكورات اللي كان لها نصيب الأسد في دخول المشاهدين للمود العام للأحداث زي ما عودتنا السلسلة، أما تراجع الموسيقى التصويرية فـ كان من العوامل السلبية اللي قابلتنا في مشاهدة الفيلم.

لو ماشوفتش أي جزء سابق من The hunger games هـ تكون بـ تضيع وقتك مع الجزء ده.. أما لو كنت زينا من المنتظرين للجزء الأخير من السلسلة نوعدك بمشاهدة متميزة تليق بنهاية The hunger games.