The Definitive Guide to Living in the Capital , Cairo , Egypt

الجميل فى فيلم The Intern أنه تمامًا نفس الموجود فى التريلر الخاص بالفيلم، ونفس اللى توقعناه عن الأحداث، ونفس اللى أظهره الفيلم فى كل مشهد، هو فيلم كوميدي تقليدي بـ يحاول يحجز مساحة فى مشاهدات السينما فى الويك إند لمجموعة من المشاهدين مش عاوزة أكثر من بعض الكوميديا البسيطة مع مشروب مثلج.

من تأليف وإخراج نانسي مايرز بـ نشوف آن هاثاواي وروبرت دي نيرو فى قصة شبه محفوظة عن رجل عجوز بـ يلتحق بالتدريب فى أحد مواقع الويب المهتمة بالموضة والملابس والإكسسوارات، ومع اعتمادهم الأساسي على تقنيات الإنترنت ومواقع التواصل الاجتماعي وغيرها من مفردات لغة العصر، بـ يقع "وايتكر" فى كثير من المواقف الكوميدية مع خيط رومانسي خفيف بـ يظهر بشكل أكثر قوة فى النصف الثاني من الأحداث.

زي ما قولنا هو ده بالضبط اللى بـ يقوله التريلر وهو ده توقعنا من الفيلم، لكن الحقيقة كنا نتوقع جرعة أكبر من الكوميديا، أو حتى الاعتماد على مصادر جديدة للكوميديا فى الفيلم، إلا أن الكوميديا كان منبعها دائمًا وأبدًا التناقضات بين الرجل العجوز اللى مش فاهم بديهيات الحياة الإلكترونية اليومية زي أنستجرام وفيسبوك وتويتر وغيرها، وبين كلمة "متدرب" اللى تعودنا كلنا أنه يتم إطلاقها على شباب صغير فى السن مش ناس كبيرة.

ميزانية الفيلم كانت حوالى 40 مليون دولار وكان من المقرر أن تقوم ريز ويذرسبون بأداء الدور في الأصل ولكن آن هاثاواي حلت محلها في النهاية، وبما أننا بـ نتكلم عن ميزانية الفيلم لازم ننوه إلى الاعتماد الكبير على منتجات شركة آبل فى أحداث الفيلم، بداية من كمبيوترات Mac ونهاية بهواتف iPhone، مع بعض المشاهد اللى بـ يتم عمل اتصالات فيها من خلال برامج مشهورة زي skype على سبيل المثال، ونعتقد أن الشركات دي بـ تساهم فى إنتاج الأفلام دي مقابل استعمال أبطالها لمنتجاتهم فى الأحداث.

الموسيقى التصويرية والديكورات كانت بسيطة وهادئة وغير متكلفة، وفى نفس الوقت كانت معبرة عن البيئة اللى بـ تنتمى لها الفيلم، خاصة بيئة العمل والمكاتب والحياة اليومية لفريق عمل موقع إلكتروني المفروض أنه واصل لمستويات قوية جدًا ومتميزة فى مجاله.

باختصار.. فيلم The Intern بـ نوصي به للناس اللى عاوزة فيلم ما تتعبش فى مشاهدته.. وتقدر تشوفه فى أي وقت ومع أي حد بدون إزعاج أو تفكير كثير.