The Definitive Guide to Living in the Capital , Cairo , Egypt

هل فعلًا الحب يقدر يقف في وجه أي شيء وكل شيء؟ وهل الاختيارات اللي بتفرضها علينا أحيانًا علاقاتنا العاطفية ممكن تقدر تتصدي لظروف المجتمع اللي بنتواجد فيه؟ حتى لو كانت ظروف المجتمع عبارة عن حرب بتطحن الجميع؟

مجموعة من الأسئلة بيحاول يجاوب عليها فيلم The last face من بطولة تشارليز ثيرون و خافيير بارديم و أديل إكسارشوبولوس ومن إخراج شون بن.

الفيلم بتدور أحداثه في فترة الحرب الأهلية الليبيرية.. ولأن معلوماتنا قليلة عن الحرب دي، قرينا وعرفنا أن تاريخ الصراع في ليبيريا بينقسم لحرب أهلية أولى وحرب أهلية ثانية اندلعت سنة 1999 بدعم من بعض الدول المجاورة.

الفيلم بياخد فترة الحرب كخلفية لأحداثه اللي بتحكي عن علاقة حب بتنشأ بين اثنين من العاملين بمجال الإغاثة في المناطق المنكوبة بسبب الحرب.

الفيلم بيبدأ بعد كده يواجهنا بقصة الحب وهل هتقدر تصمد خلال اختبار الحرب والظروف الاجتماعية والبيئية الصعبة اللي بيتناولها الفيلم بتفصيل وتركيز؟ هو ده السؤال اللي بيطرحه الفيلم من خلال أحداثه اللي مافيهاش تنويع كبير علي مستوى الأحداث وإن حاولت تقدم قصة رومانسية قوية.

المميز في الفيلم كان السيناريو المترابط والقوي، رغم أنه وقع في فخ الملل في بعض المراحل، لكن بصفة عامة ما نقدرش ننكر جمال قصة الحب اللي بيقدمها اثنين من أساتذة التمثيل في هوليود  هم تشارلز ثيرون وخافير بارديم. إحنا مش ناسيين خافير بارديم اللي قام بدور الشرير في فيلم جيمس بوند الأشهر Skyfall واللي حقق شهرة عظيمة نتيجة أداؤه لدور الشرير المختل عقليًا بعبقرية حقيقية.

موسيقي الفيلم وديكوراته كانت قوية ومتميزة إلي أقصي الحدود، وقدرت تجسد قصة الحب الرومانسية علي الرغم من بشاعة الواقع اللي بيناقشه الفيلم واللي قدر يجسده في عدد من المشاهد برضه.

باختصار The last face فيلم رومانسي جميل يستحق المشاهدة.

علشان تبقي عارف: الفيلم يعتبر أول فيلم يخرجه شون بن بعد غياب عن اﻹخراج دام تسع سنوات.