The Definitive Guide to Living in the Capital , Cairo , Egypt

على الرغم  من انبساطنا واستمتاعنا بالفيلم، إلا أننا حسينا أن لو المشاهد كان أكتر تخصصًا في مجال الرياضيات كان ممكن يكون استمتاعه بالفيلم أكتر بكتير.. للأسف محرر كايرو 360 علاقته بالأرقام زي علاقة أحمد شوبير بالباليه المائي!

الفيلم من إخراج وتأليف مات براون وبطولة ديف باتل وجيرمي إيرونز ومالكون سينكلير، والفيلم نفسه مقتبس عن قصة حقيقية، عن حياة عالم الرياضيات الهندي المعجزة (رامانوجان)، وإزاي بدأت حياته في مدينة مدراس في الهند كشاب فقير متزوج حديثًا ومش عارف يصرف على زوجته لفقره الشديد، وإزاي ماقدرش ينسى حلمه أنه يقدم اكتشافات جديدة في مجال الرياضيات وطرق إثبات النظريات الرياضية المختلفة، لكنه بيقرر ينسى كل شيء مؤقتًا ويلتحق بوظيفة بسيطة في الهند.

بتستمر الأحداث وبنشوف (رامانوجان) لما بيسافر انجلترا بناء على دعوة من أحد أساتذة الرياضيات، وإزاي أن فكرة السفر بحد ذاتها كانت مخالفة للتعاليم الدينية الهندوسية، وتأثير سفره على العلاقة بين زوجته وبين والدته، لكن رامانوجان كان عنده حلم كبير.. مش هيسكت قبل ما يحققه.

على الرغم من فكرة الحلم وتحقيقه ممكن تكون فكرة مبشرة وجميلة، إلا أن النمط العام للفيلم كان أكثر ميلًا للجانب المأساوي والحزين، والحقيقة أننا لما قرينا قصة رامانوجان الحقيقية، عذرنا القائمين على الفيلم، الصراحة الراجل عاش حياة قصيرة حزينة كئيبة وتعرض لكتير من الإهانات العنصرية من البريطانيين اللي مش متقبلين فكرة أن حد من أحد مستعمراتهم يتفوق عليهم في مجال الرياضيات.

الديكورات كانت متميزة وقدرت تنقلنا زمنيًا لزمن الحرب العالمية، الإضاءة كمان كانت خافتة معظم الفيلم وساهمت في تشكيل شعورنا بالتراجيديا، وعلى الرغم من الطابع الهندي المميز للفيلم إلا أن الموسيقى التصويرية ما استفادتش بالموضوع ده لتقديم موسيقي تصويرية هندية كانت ممكن تخرجنا من جو الشجن اللي الفيلم حطنا فيه.

ادخلوا فيلم The Man Who Knew Infinity لو عاوزين تشوفوا قصة جادة وشيقة رغم أنها حزينة، أو لو كنتم من محبي الأفلام المقتبسة عن قصص حقيقية، أو لو كنتم طبعًا من عشاق الرياضيات والأرقام .