The Definitive Guide to Living in the Capital , Cairo , Egypt

The Other Woman

The other Woman: صحوبية الزوجة والعشيقة!

  • كاميرون ديازكايت أبتون...
  • كوميدي
  • نيك كاسافيتسنيك كاسافيتس
  • في1 Cinema
تم التقييم بواسطة
Mohamed Hamdy
قيم
قيم الآن
The other Woman: صحوبية الزوجة والعشيقة!

فى أوقات الأزمات السياسية والاجتماعية بـ يكون من الرائع أننا نتفرج على فيلم كوميدي يخرجنا من الحالة الصعبة اللى بـ نبقى فيها، بالإضافة إلى اسم كاميرون دياز كممثلة قوية، نقدر نقول أن كل العوامل دى مع بعضها أدت إلى زيادة الإقبال على مشاهدة الفيلم، لكن هل الفيلم كان على نفس القوة المتوقعة منه؟

بصراحة نقدر نقول “نعم” كإجابة على السؤال ده بضمير مستريح، المخرج نيك كازافيتس قدر يعمل خليط كوميدي رومانسى ناجح باقتدار، من خلال التعرض لحياة الزوج اللعوب مارك (نيكولا كوستر والدو) اللى بـ يخون زوجته كاتي (ليزلي مان)، إلا أنها بـ تكتشف خيانته لكن -ياللعجب- بدل ما تتخانق مع عشيقاته الاثنين بـ تتصاحب عليهم وبـ يبدأوا يلعبوا على الزوج اللى فاكر نفسه أذكى رجل فى العالم.

طبعًا لكم أن تتخيلوا كم المشاهد الكوميدية اللى ممكن تظهر من اتحاد 3 نساء على رجل واحد، وإزاى ممكن الكاتبة ميليسا ستاك تحول كل موقف مهما كان صغير لموقف قادر على إخراج القهقهات من أفواه المشاهدين، وخصوصًا الأداء الرائع لليزلى مان واللى ساعدها على إبراز مواهبها التمثيلية قدرات كاميرون دياز المعروفة فى التمثيل، إلا أن أداء كيت أبتون فى دور العشيقة الثانية (آمبر) كان أقل من باقى الأدوار النسائية فى الفيلم.

الموسيقى التصويرية لعبت دور مهم فى حماسنا ناحية الفيلم، تم الاستعانة فيها ببعض التراكات العالمية زى التراك الفرنسى المشهور la vie en rose اللى المصريين كلهم عرفوه من خلال غناء يسرا له فى فيلم “عمارة يعقوبيان”، أو التراك الأشهر لموسيقى فيلم Mission Impossible كلها كانت بتوزيعات جديدة تستحق الاستماع والاهتمام.

الديكورات كانت كمان ممتازة خصوصًا ديكور مكتب المحاماة بتاع كاميرون دياز، وغيرها من الديكورات اللى كانت متماشية مع الأحداث، وعجبنا اختيار الشواطىء المفتوحة والكادرات الواسعة فى التصوير خصوصًا فى الربع الأخير من الفيلم، لكن طبيعة الفيلم والحوارات الطويلة اللى بـ يتم مناقشة الجنس فيها باستفاضة وشرح أمور كثير بالإضافة لكثير من المشاهد بـ تخلينا نقول أن الفيلم للكبار فقط، على الرغم من التدخل الرقابى اللى حسينا به فى بعض المشاهد، وعدم التنويه لأن الفيلم للكبار فقط، لكن من خلال مشاهدتنا نقدر نجزم بالحقيقة دى، الحقيقة اللى نبهنا لها عمال الـ “ريبليسير” فى سينما سيتى ستارز بتهذيب، الأمر اللى بـ يعرفنا أن المجتمع بالكامل ممكن يمارس أسلوبه الشخصى المحترم من الرقابة.

فيلم The other Woman كوميدي خفيف وجميل، ويستحق المشاهدة، خصوصًا فى الأحداث الصعبة اللى بـ نشوفها مؤخرًا زى ما قولنا فى بداية الريفيو.

عجبك ؟ جرب

The other Guy

نصيحة 360

على الرغم من عدم وجود أى تنويه على الأفيش، إلا أننا نقدر نعتبر الفيلم للكبار فقط، لا ننصح باصطحاب الأطفال أو المراهقين.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح